റാന്നി : മകരസംക്രമസന്ധ്യയിൽ ശബരിഗിരീശന് ചാർത്താനുള്ള തിരുവാഭരണങ്ങളുമായി എത്തുന്ന ഘോഷയാത്രയെ വരവേൽക്കാൻ റാന്നിയിൽ ഒരുക്കങ്ങൾ അവസാനഘട്ടത്തിൽ. പാതകൾ അലങ്കരിക്കുന്ന ജോലികളും സ്വീകരണകേന്ദ്രങ്ങളിൽ സൗകര്യങ്ങൾ ഒരുക്കുന്ന പണികളുമാണ് പൂർത്തിയായി വരുന്നത്. ശനിയാഴ്ച പന്തളത്തുനിന്ന് ആരംഭിക്കുന്ന ഘോഷയാത്ര രാത്രി റാന്നി താലൂക്കിൽ പ്രവേശിക്കും.
അന്ന് പുതിയകാവ് ക്ഷേത്രത്തിൽ വിശ്രമിച്ചശേഷം ഞായറാഴ്ച പുലർച്ചെ രണ്ടിന് പുറപ്പെടും. മൂക്കന്നൂർ ഗ്രന്ഥശാലാ പടി, മഹാദേവ ക്ഷേത്രം, ഇളപ്പുങ്കൽ, ഇടപ്പാവൂർ ക്ഷേത്രം, പേരൂച്ചാൽ എന്നിവിടങ്ങളിൽ വിവിധ ഹൈന്ദവ സംഘടനകളുടെയും ക്ഷേത്രഭരണ സമിതിയുടെയും നേതൃത്വത്തിൽ ഭക്തർ സ്വീകരണം നൽകുമെന്നും അറിയിച്ചിട്ടുണ്ട്.
