ഷാർജ : ശ്രവണകലയുടെ സാധ്യതകൾ ഉപയോഗിച്ചുള്ള ‘ഹുങ്കാരോ’ എന്ന നാടകം അരങ്ങിലെത്തുന്നു. മോഹിത് തകൽക്കറിന്റെ നാടകം ഷാർജ ആർട്ട് ഫൗണ്ടേഷൻ സംഘടിപ്പിക്കുന്ന ഗ്രാൻഡ് ഫിനാലെയിൽ അവതരിപ്പിക്കും. 90 മിനിറ്റ് ദൈർഘ്യമുള്ള നാടകം 17,18 തീയതികളിൽ രാത്രി 8.30-ന് ഷാർജ റോളയിലെ കാലിഗ്രഫി സ്ക്വയറിൽ അരങ്ങേറും. പെർഫോം ഷാർജയുടെ സീസൺ രണ്ടിന്റെ ഭാഗമായാണ് നാടകാവതരണം.
മുഖഭാവം, ശരീരഭാഷ, ഉച്ചാരണം എന്നിങ്ങനെ വ്യത്യസ്ത ഭാവങ്ങളിലൂടെ കഥപറയുന്ന നാടകം കാഴ്ചക്കാർക്ക് വേറിട്ട അനുഭവമായിരിക്കുമെന്ന് ഷാർജ ആർട്ട് ഫൗണ്ടേഷൻ അധികൃതർ വ്യക്തമാക്കി.
