കൊല്ലം: കൊല്ലത്ത് വീട്ടിൽ അതിക്രമിച്ച് കയറി 73കാരിയെ പീഡിപ്പിച്ചത് മയക്കുമരുന്ന് കേസിലടക്കം പ്രതിയായ പടയപ്പ ജോയിയാണെന്ന് പോലീസ്. സംഭവത്തിൽ തങ്കശ്ശേരി സ്വദേശിയായ പടയപ്പ ജോയി എന്ന് വിളിക്കുന്ന ജോസഫിനെ കൊല്ലം വെസ്റ്റ് പോലീസ് അറസ്റ്റ് ചെയ്തു. ഇയാൾ ലഹരിമരുന്ന് കേസുകളിൽ അടക്കം പ്രതിയാണെന്ന് കൊല്ലം പോലീസ് വ്യക്തമാക്കി.വെള്ളിയാഴ്ച പുലർച്ചെ 5.30യോടെയാണ് വയോധിക ഒറ്റയ്ക്ക് താമസിക്കുന്ന വീട്ടിൽ ജോസഫ് എത്തിയത്. വീടിന്റെ അടുക്കള വാതില് പെളിച്ച് പ്രതി അകത്ത് കയറി. തുടർന്ന് ഉറങ്ങിക്കിടക്കുകയായിരുന്ന 73 കാരിയെ ലൈംഗികമായി പീഡിപ്പിച്ചു.
ശാരീരിക ബുദ്ധിമുട്ടുകളെ തുടർന്ന് വയോധിക രാവിലെ ആശുപത്രിയിൽ ചികിത്സ തേടി. വയോധിക നൽകിയ പരാതിയുടെ അടിസ്ഥാനത്തിൽ കൊല്ലം വെസ്റ്റ് പോലീസ് കേസെടുത്ത് അന്വേഷണം ആരംഭിച്ചു. മഫ്തിയിൽ തെരച്ചിൽ നടത്തിയ പോലീസ് സംഘം ഇന്നലെ രാത്രിയോടെ പ്രതിയെ അറസ്റ്റ് ചെയ്തു. 33 കാരനായ ജോസഫ് വിവിധ ലഹരി മരുന്ന് കേസുകളിലും പ്രതിയാണെന്ന് പോലീസ് പറഞ്ഞു. ഇയാൾ ലഹരിക്ക് അടിമയാണെന്നും പോലീസ് വ്യക്തമാക്കി. കോടതിയില് ഹാജരാക്കിയ പ്രതിയെ റിമാന്റ് ചെയ്തു.
