പത്തനംതിട്ട : പന്തളത്ത് കേന്ദ്ര സർക്കാരിന്റെ അമൃത് സ്കീം ഫണ്ടിൽ നിന്നുള്ള വികസന പദ്ധതികളിൽ പന്തളത്തേയും പരിഗണിക്കണമെന്നാവശ്യപ്പെട്ട് പന്തളം നഗരസഭ ചെയർ പേഴ്സൺ സുശീല സന്തോഷ് കേന്ദ്ര നഗര വികസന വകുപ്പ് മന്ത്രി ഹർദീപ് സിങ് പുരിക്ക് നേരിട്ട് നിവേദനം സമർപ്പിച്ചു. ലക്ഷക്കണക്കിന് ഭക്തജനങ്ങൾ വന്നുപോകുന്ന പന്തളത്ത് പിൽഗ്രിം ഗസ്റ്റ് ഹൗസ്, പാർക്കിങ് സംവിധാനം, മുനിസിപ്പൽ ബസ് ടെർമിനൽ, ടൂറിസ്റ്റ് ഹോട്ടൽ, ഹൈ ടെക് ട്രേഡ് സെന്റർ, ഓപ്പൺ എയർ ഓഡിറ്റോറിയം, ഷോപ്പിങ് കോംപ്ലക്സ് എന്നിവയും ഇൻഡോർ സ്റ്റേഡിയം, സ്പോർട്സ് കോംപ്ലക്സ് എന്നിവയും ഉൾപ്പെടെ വിപുലമായ പദ്ധതികളാണ് കേന്ദ്ര സർക്കാരിന്റെ അമൃത് സ്കീമിൽ ഉൾപ്പെടുത്താനായി നഗരസഭ മുന്നോട്ടുവെച്ചിട്ടുള്ളത്.
കേന്ദ്രത്തിൽ നിന്നുമാണ് ഇതിന് ഫണ്ട് ലഭ്യമാക്കുന്നത്. പദ്ധതികളിൽനിന്ന് ലഭിക്കുന്ന വരുമാനം പൂർണമായും നഗരസഭയ്ക്ക് സുസ്ഥിരമായി വന്ന് ചേരുകയും ചെയ്യുമെന്നതിനാൽ അമൃത് സ്കീമിൽ പെടുന്ന കേന്ദ്ര ധനസഹായം പന്തളം പ്രദേശത്തിന് വളരെ ഗുണകരമാകുമെന്നാണ് നഗരസഭയുടെ കണക്കുകൂട്ടലുകൾ.
