തിരുവല്ല: ദേഹാസ്വാസ്യത്തെ തുടർന്ന് മരത്തിൽ കുടുങ്ങിയ മരംവെട്ട് തൊഴിലാളിയെ അഗ്നി രക്ഷാസേന രക്ഷപ്പെടുത്തി. കവിയൂർ കളമ്പുകേളയിൽ വീട്ടിൽ വിനോദ് (32) നെയാണ് തിരുവല്ലയിൽ നിന്നുള്ള അഗ്നിരക്ഷാസേന രക്ഷപ്പെടുത്തിയത്. തിരുമൂലപുരം നെല്ലിവേലിൽ മാത്യു കുരുവിളയുടെ പുരയിടത്തിലെ തേക്കു മരത്തിന്റെ 60 അടിയോളം ഉയരമുള്ള ശിഖരത്തിലാണ് വിനോദ് കുടുങ്ങിയത്.
വ്യാഴാഴ്ച ഉച്ചയ്ക്ക് ഒരു മണിയോടെയായിരുന്നു സംഭവം. സംഭവമറിഞ്ഞ് സ്ഥലത്തെത്തിയ അഗ്നി രക്ഷാസേന ഉദ്യോഗസ്ഥർ വടവും വലയും ഉപയോഗിച്ച് വിനോദിനെ താഴെ എത്തിക്കുകയായിരുന്നു. സ്റ്റേഷൻ ഓഫീസർ ബാബു, ഗ്രേഡ് അസിസ്റ്റന്റ് സ്റ്റേഷൻ ഓഫീസർ എം.എസ്.അനിൽകുമാർ, ഫയർ ഓഫീസർമാരായ പി.സജു, എം.എസ്.അനൂപ്, വർഗീസ് ഫിലിപ്പ്, ഡ്രൈവർമാരായ ശിവപ്രസാദ്, സുധീഷ് എന്നിവ സംഘത്തിന്റെ നേതൃത്വത്തിൽ ആയിരുന്നു രക്ഷാപ്രവർത്തനം.
