മികച്ച നടി, അവതാരക, റേഡിയോ ജോക്കി തുടങ്ങി കൈവെച്ച മേഖലയിൽ എല്ലാം ഏറ്റവും മികച്ചതിൽ കുറഞ്ഞതൊന്നും നൽകിയിട്ടില്ലാത്ത താരമാണ് നൈല ഉഷ. താൻ സ്വന്തമാക്കാൻ ആഗ്രഹിച്ച വാഹനങ്ങളുടെ പട്ടികയിൽ ആദ്യത്തെ വാഹനം സ്വന്തമാക്കിയ സന്തോഷത്തിലാണ് താരം. റേഞ്ച് റോവർ സ്പോട്ട് എച്ച്.എസ്.ഇ. ബ്ലാക്ക് എഡിഷനാണ് നൈല ഉഷയുടെ ഗ്യാരേജിൽ പുതുതായി എത്തിയിട്ടുള്ള ആഡംബര വാഹനം.
ഇഷ്ടനിറത്തിലുള്ള തന്റെ സ്വപ്ന വാഹനം സ്വന്തമാക്കിയ സന്തോഷം താരം തന്നെയാണ് സാമൂഹിക മാധ്യമങ്ങളിൽ പങ്കുവെച്ചത്. മനോഹരമായ റേഞ്ച് റോവർ സ്പോട്ട് എച്ച്.എസ്.ഇ. ബ്ലാക്ക് എഡിഷൻ സ്വന്തമാക്കി. ഈ സുന്ദര നിമിഷത്തിലേക്ക് എന്നെ എത്തിച്ച എല്ലാവർക്കും നന്ദി, ശ്രദ്ധയുള്ള ഡ്രൈവർ ആയിരിക്കുമെന്ന് ഉറപ്പ് നൽകുന്നു എന്ന കുറിപ്പോടെയാണ് താരം തന്റെ പുതിയ വാഹനത്തിന്റെ വിശേഷം പങ്കുവെച്ചിട്ടുള്ളത്.
ഔഡി എ 7 എന്ന ആഡംബര വാഹനമായിരുന്നു നൈല മുമ്പ് ഉപയോഗിച്ചിരുന്നത്. മകനൊപ്പം എത്തിയാണ് താരം ഈ വാഹനം സ്വന്തമാക്കിയിട്ടുള്ളത്. 2.0 ലിറ്റർ, 3.0 ലിറ്റർ, 5.0 ലിറ്റർ വി8 എന്നീ എൻജിൻ ഓപ്ഷനുകളിലാണ് റേഞ്ച് റോവർ ബ്ലാക്ക് സ്പോട്ട് ദുബായിയിലെ വിപണിയിൽ അവതരിപ്പിച്ചിട്ടുള്ളത്. എന്നാൽ ഇതിൽ ഏത് എൻജിൻ ഓപ്ഷനിലുള്ള വാഹനമാണം താരം സ്വന്തമാക്കിയിരിക്കുന്നതെന്ന് വ്യക്തമാക്കിയിട്ടില്ല.
