കോന്നി : കഴിഞ്ഞ ദിവസം പുലി വളര്ത്തുനായയെ പിടിച്ച പയ്യനാമണ് ഇരുപതേക്കറില് വനം വകുപ്പ് നിരീക്ഷണ ക്യാമറകള് സ്ഥാപിച്ചു. ഞള്ളൂര് ഫോറസ്റ്റ് ഡെപ്യൂട്ടി നൗഷാദിന്റെ നേതൃത്വത്തിലുള്ള വനപാലക സംഘമാണ് ക്യാമറ സ്ഥാപിച്ചത്. മൂന്നു ക്യാമറകള് ആണ് പ്രദേശത്ത് വിവിധ ഇടങ്ങളിലായി സ്ഥാപിച്ചിട്ടുള്ളത്. കഴിഞ്ഞ ദിവസം ജനവാസ മേഖലയില് ഇറങ്ങിയ പുലി പ്രദേശവാസികളുടെ കണ്മുന്നിലൂടെയാണ് വളര്ത്തു നായയെ പിടികൂടിയ ശേഷം വനത്തിലേക്ക് മറഞ്ഞത്. മുരളി ഭവനത്തില് മോഹനന്റെ നായയെ ആണ് പുലി പിടിച്ചത്. ഇരുപതേക്കര്, തവളപ്പാറ പ്രദേശങ്ങളില് വനം വകുപ്പ് വനാതിര്ത്തികളില് സോളാര് ഫെന്സിംഗ് വേലികള് സ്ഥാപിച്ചിരുന്നു എങ്കിലും ഇതില് പലതും നശിച്ചു പോയിരിക്കുകയാണ്.
പ്രദേശത്ത് മുമ്പും പുലിയുടെ സാന്നിധ്യം കണ്ടെത്തിയതായി ടാപ്പിംഗ് തൊഴിലാളികള് അറിയിച്ചിരുന്നുവെങ്കിലും വനപാലകര് ഇത് മുഖവിലയ്ക്ക് എടുത്തിരുന്നില്ല. ഇതിനു ശേഷമാണ് ഇപ്പോള് ആളുകളുടെ മുന്നില് നിന്ന് തന്നെ പുലി വളര്ത്തു നായയെ പിടിച്ചത്. കേന്ദ്രീയ വിദ്യാലയം അടക്കം ഇതിനോട് ചേര്ന്ന പ്രദേശങ്ങളില് സ്ഥിതി ചെയ്യുന്നതിനാല് ഭീതിയിലാണ് നാട്ടുകാര്. പുലര്ച്ചെ ടാപ്പിംഗ് ജോലിക്ക് പോകുന്ന ആളുകള് ജോലിക്ക് പോകുന്നത് പോലും ഭയന്നാണെന്ന് നാട്ടുകാര് പറയുന്നു. സ്ഥലത്ത് ക്യാമറ സ്ഥാപിച്ചിട്ടുണ്ട് എങ്കിലും പുലിക്കൂട് സ്ഥാപിച്ച് പുലിയെ പിടികൂടണം എന്നാണ് നാട്ടുകാര് ആവശ്യപ്പെടുന്നത്.
