റാന്നി: അങ്ങാടി കുടുംബാരോഗ്യ കേന്ദ്രത്തിന് വേണ്ടി നിർമിച്ച പുതിയ കെട്ടിടത്തിൻ്റെ ഉദ്ഘാടനം 30 ന് നടക്കും. സംസ്ഥാന ആരോഗ്യ വനിതാ ശിശു വികസന വകുപ്പ് മന്ത്രി വീണാ ജോർജ് കെട്ടിടത്തിൻ്റെ ഉദ്ഘാടനകർമം നിർവഹിക്കും. ഉച്ചയ്ക്ക് ശേഷം 3 ന് അഡ്വ. പ്രമോദ് നാരായൺ എം.എൽ.എ അധ്യക്ഷത വഹിക്കുന്ന യോഗത്തിൽ അഡ്വ. ആൻ്റോ ആൻ്റണി എം.പി, മുൻ എം.എൽ.എ രാജു എബ്രഹാം എന്നിവർ പങ്കെടുക്കും. നെല്ലിക്കമൺ ചാലുമാട്ട് സി.എം. വർഗീസ്, എൽസി വർഗീസ്, ജേക്കബ് സി. മാത്യു എന്നിവർ സൗജന്യമായി നൽകിയ സ്ഥലത്താണ് രണ്ട് നിലകളിലായി ആശുപത്രി കെട്ടിടം നിർമിച്ചത്.
ഉദ്ഘാടന സമ്മേളനനത്തിനായി നെല്ലിക്കമണ്ണിൽ സ്വാഗത സംഘം യോഗം ചേര്ന്നു. ഗ്രാമ പഞ്ചായത്ത് പ്രസിഡൻ്റ് അഡ്വ. ബിന്ദു റെജി (ചെയർമാൻ), നിസാം കുട്ടി (കൺവീനർ), പഞ്ചായത്ത് വൈസ് പ്രസിഡൻ്റ് ബിച്ചു ഐക്കാട്ടു മണ്ണിൽ ( ഫിനാൻസ് ), ഷൈനി മാത്യൂസ് ( പ്രോഗ്രാം), എലനിയമ്മ ഷാജി ( റിസപ്ഷൻ ), ബി.സുരേഷ് ( ഫുഡ് ), പി.എസ് സതീഷ് കുമാർ ( പബ്ളിസിറ്റി) എന്നിവർ ചെയർമാൻമാരായി വിവിധ കമ്മിറ്റികൾ രൂപീകരിച്ചു.
