കോഴിക്കോട്: ഹോട്ടലുടമയായ സിദ്ദിഖിനെ കൊലപ്പെടുത്തിയ കേസിലെ പ്രതികള് ജംഷേദ്പൂരിലേക്ക് കടക്കാന് ശ്രമിക്കുന്നതിനിടെയാണ് ചെന്നൈയിലെ എഗ്മോര് സ്റ്റേഷനില് വച്ച് ആര്പിഎഫ് സംഘം കസ്റ്റഡിയിലെടുത്തത്. ഷിബിലും ഫര്ഹാനയും എഗ്മോറില്നിന്ന് ജംഷേദ്പുര് ടാറ്റാ നഗറിലേക്ക് കടക്കാനായിരുന്നു പദ്ധതി. ഈ ട്രെയിനിനായി വെയിറ്റിങ് റൂമില് കാത്തിരിക്കുകയായിരുന്ന ഇരുവരെയും ആര്പിഎഫ് നടത്തിയ പരിശോധനയില് കണ്ടെത്തുകയും കസ്റ്റഡിയിലെടുക്കുകയുമായിരുന്നു. അതേസമയം അട്ടപ്പാടി സിദ്ദിഖിന്റെ മൃതദേഹം പോസ്റ്റ്മോര്ട്ടത്തിനായി കോഴിക്കോട് മെഡിക്കല് കോളജില് എത്തിച്ചു.
വെള്ളിയാഴ്ച ഉച്ചയോടെയാണ് വെട്ടിനുറുക്കിയ മൃതദേഹം മെഡിക്കല് കോളജ് മോര്ച്ചറിയില് എത്തിച്ചത്. ഒരാഴ്ച മുന്പാണ് ഹോട്ടലിലെ ജീവനക്കാരനായിരുന്ന ഷിബിലിനെ സിദ്ദിഖ് ജോലിയില്നിന്ന് പറഞ്ഞുവിട്ടത്. ഇയാളുടെ പെരുമാറ്റദൂഷ്യത്തെക്കുറിച്ച് മറ്റുജീവനക്കാര് പരാതി ഉന്നയിച്ച സാഹചര്യത്തിലാണ് ഇയാളെ പറഞ്ഞുവിടാന് സിദ്ദിഖ് തീരുമാനിച്ചത്. ഷിബിലിന് ശമ്പളമെല്ലാം കൊടുത്തുതീര്ത്തിരുന്നതായും ഹോട്ടല് ജീവനക്കാര് പറഞ്ഞു.
