പത്തനംതിട്ട : നഗരസഭ ആറാം വാർഡിൽ പുതിയതായി നിർമ്മിച്ച അങ്കണവാടി കെട്ടിടം ജൂൺ 30 തിങ്കളാഴ്ച നാടിന് സമർപ്പിക്കും. നഗരസഭ ചെയർമാൻ അഡ്വ. ടി സക്കീർ ഹുസൈൻ ഉദ്ഘാടനം നിർവഹിക്കും. വാർഡ് കൗൺസിലർ ആൻസി തോമസ് അധ്യക്ഷത വഹിക്കും. 850 ചതുരശ്ര അടി സ്ഥലത്ത് 25 ലക്ഷം രൂപ ചിലവിലാണ് അങ്കണവാടി നിർമ്മിച്ചത്. ഇവരെല്ലാം വിവിധതരത്തിൽ കെട്ടിടം പൂർണമായും ശീതീകരിച്ചിട്ടുണ്ട്. കുട്ടികളുടെ കളിക്കോപ്പുകളും എത്തിക്കഴിഞ്ഞു. നിലവിലെ ഭരണസമിതിയുടെ കാലയളവിൽ 6 അങ്കണവാടികൾക്കാണ് സ്വന്തം കെട്ടിടം നിർമ്മിച്ചത്.
നഗരസഭയുടെ തനത് ഫണ്ട് ഉപയോഗിച്ച് വാങ്ങിയ സ്ഥലത്താണ് പുതിയ അങ്കണവാടികൾ നിർമ്മിച്ചത്. നഗരത്തിലെ പത്ത് അങ്കണവാടികൾ സ്മാർട്ട് അങ്കണവാടികളാണ്. എല്ലാ അങ്കണവാടികളും സ്മാർട്ടാക്കാനുള്ള പ്രവർത്തനങ്ങൾ പുരോഗമിക്കുകയാണ്. നഗരസഭ 22-ാം വാർഡിൽ നിർമ്മിക്കുന്ന അങ്കണവാടി ഉടൻ ഉത്ഘാടനം ചെയ്യും. മുണ്ടുകോട്ടക്കലിൽ തിങ്കളാഴ്ച ഉത്ഘാടനം ചെയ്യുന്ന അങ്കണവാടി നഗരസഭ ചെയർമാൻ സന്ദർശിച്ചു. കൗൺസിലർ ആൻസി തോമസ്സ്, മുനിസിപ്പൽ എഞ്ചിനീയർ സുധീർ രാജ് എന്നിവരും ഒപ്പമുണ്ടായിരുന്നു.
