റാന്നി: സെന്റ് തോമസ് കോളേജിൽ നടന്നുകൊണ്ടിരിക്കുന്ന ശാസ്ത്രപ്രദർശനവും വിജ്ഞാനോത്സവം കോളേജ് മാനേജർ പ്രൊഫ. റോയി മേലേൽ ഉദ്ഘാടനം ചെയ്തു. പ്രിൻസിപ്പൽ ഡോ. സ്നേഹ എൽസി ജേക്കബ് അധ്യക്ഷത വഹിച്ചു. ജനറൽ കൺവീനർ ഡോ. എം. കെ. സുരേഷ്, ജോയിന്റ് കൺവീനർ പ്രൊഫ. പ്രശാന്ത് എ.പി, യൂണിയൻ ചെയർമാൻ ബെൻസൺ പി. സണ്ണി, കൗൺസിലർ കെ.എസ്. അഭിരാജ്, ആദിത്യ എസ്. എന്നിവർ പ്രസംഗിച്ചു. ശാസ്ത്ര സാങ്കേതിക രംഗത്തെ വിവിധ വകുപ്പുകളുമായി ചേർന്ന് സംഘടിപ്പിച്ചിരിക്കുന്ന പ്രദർശനം കാണാൻ നിരവധി സ്കൂൾ- കോളേജ് വിദ്യാർഥികൾ സന്നിഹിതരായിരുന്നു. ഇന്ത്യയുടെ ബഹിരാകാശ ദൗത്യങ്ങളിൽ ഉപയോഗിക്കുന്ന ഉപഗ്രഹങ്ങളുടെയും റോക്കറ്റുകളുടെയും മാതൃകകൾ, പുത്തൻകാഴ്ച അനുഭവങ്ങൾ സമ്മാനിക്കുന്ന വെർച്വൽ റിയാലിറ്റി ഷോ, ലൈവ് മ്യൂസിക് & ഡാൻസ് എന്നിവ എക്സിബിഷന്റെ വേറിട്ട കാഴ്ചകളാണ്.
കേരളത്തിൽ ഇന്നു ജീവിച്ചിരിക്കുന്ന ഏറ്റവും വലിയ ഇഗ്വാന, പേർഷ്യൻ ക്യാറ്റ്, വിരളമായി മാത്രം കാണുന്ന മാർമോസെറ്റ് കുരങ്ങ്, വിദേശരാജ്യങ്ങളിൽ മാത്രം കാണപ്പെടുന്ന പല ഇനങ്ങളിലുള്ള പെരുമ്പാമ്പുകൾ, ഹെഡ്ജ്ഹോഗ്, ടെഗു എന്നിവ മേളയുടെ മറ്റു ആകർഷകങ്ങളാണ്. കൂടാതെ കോളേജിലെ വിദ്യാർത്ഥികളുടെ നവീന ആശയങ്ങൾ പ്രതിഫലിക്കുന്ന പ്രദർശന വസ്തുക്കൾ എന്നിവയും ക്രമീകരിച്ചിട്ടുണ്ട്. ആസ്ട്രോ കേരള കോട്ടയം ചാപ്റ്ററിന്റെ നേതൃത്വത്തിൽ ഇന്ന് വൈകിട്ട് 6 മുതൽ 9 മണി വരെ വാനനിരീക്ഷണവും സംഘടിപ്പിച്ചു. സ്കൂൾ വിദ്യാർത്ഥികളുടെ മോഡൽ പ്രദർശന മത്സരം നാളെ നടക്കും. പ്രദർശനം നാളെയാണ് സമാപിക്കുന്നത്. പൊതുജനങ്ങൾക്കും പൂർവ്വ വിദ്യാർത്ഥികൾക്കും സൗജന്യമായി പ്രദർശനത്തിൽ സംബന്ധിക്കാവുന്നതാണ്.
