കോന്നി : കോന്നി താലൂക്ക് രൂപീകരിച്ചത് മുതല് കോടതിക്കായി കാത്തിരിക്കുകയാണ് കോന്നിയിലെ ജനങ്ങള്. കോടികളുടെ വികസന പ്രവര്ത്തനങ്ങള് നടപ്പാക്കിയെന്ന് അവകാശപ്പെടുന്ന കോന്നിയില് നാളിതുവരെയായിട്ടും കോടതി സ്ഥാപിക്കാന് യാതൊരു നടപടിയും സ്വീകരിച്ചിട്ടില്ല. കോന്നിയോടൊപ്പം താലൂക്കായി ഉയര്ത്തപ്പെട്ട പത്തനാപുരത്ത് കോടതികള് പ്രവര്ത്തിച്ചു തുടങ്ങി. സംസ്ഥാന ബജറ്റില് കോടതി സ്ഥാപിക്കാന് ഒരുകോടി രൂപ സര്ക്കാര് വകയിരുത്തിയിരുന്നു. കോന്നി മിനി സിവില് സ്റ്റേഷന് പ്രവര്ത്തിക്കുന്ന കെട്ടിടത്തില് കോടതി കോംപ്ലക്സ് സ്ഥാപിക്കുവാനാണ് തുക വകയിരുത്തിയത്. സിവില് മജിസ്ട്രേറ്റ് കോടതികള് കോന്നി താലൂക്കില് ആരംഭിക്കാന് ഹൈക്കോടതി നേരത്തെ ശുപാര്ശ നല്കിയിരുന്നു.
പത്തനംതിട്ട, അടൂര്, റാന്നി കോടതികളുടെ പരിധിയിലാണ് ഇപ്പോള് കോന്നി താലൂക്ക്. കോന്നിയിലെ മലയോര മേഖലയിലെ ജനങ്ങള് കോടതി ആവശ്യങ്ങള്ക്കായി പത്തനംതിട്ടയിലാണ് കൂടുതലും എത്തുന്നത്. പതിനൊന്ന് വര്ഷമായി കോന്നി താലൂക്ക് രൂപീകരിച്ചിട്ട്. അഡ്വ.അടൂര് പ്രകാശ് റവന്യു മന്ത്രിയായിരുന്ന കാലഘട്ടത്തില് ആണ് കോന്നി താലൂക്കിന് രൂപം നല്കുന്നത്. പത്തനംതിട്ട ജില്ല രൂപീകരിച്ചത് മുതലുള്ള ആവശ്യങ്ങളില് ഒന്നായിരുന്നു കോന്നിയില് താലൂക്ക് വേണമെന്നുള്ളത്.
റവന്യൂ അടിസ്ഥാനത്തില് താലൂക്കുകള് പുനസസംഘടിപ്പിക്കുന്നത് പഠിക്കാന് നിയോഗിച്ച മിനി മാത്യു കമ്മീഷനും മൂര്ത്തി കമ്മീഷനും കോന്നി കേന്ദ്രീകരിച്ച് താലൂക്ക് രൂപീകരിക്കാന് അന്ന് ശുപാര്ശ ചെയ്തിരുന്നു. താലൂക്ക് രൂപീകരിച്ച ശേഷം നിരവധി സര്ക്കാര് സ്ഥാപനങ്ങള് കോന്നിയില് വന്നെങ്കിലും കോടതി മാത്രം യാഥാര്ധ്യമായില്ല. വര്ഷങ്ങള്ക്ക് മുന്പ് കൊല്ലം, ചെങ്ങന്നൂര് കോടതികളുടെ ഭാഗമായിരുന്ന ജില്ലയിലെ മലയോര പ്രദേശങ്ങളിലെ കോടതി വ്യവഹാരങ്ങള് പത്തനംതിട്ടയില് കോടതി വന്നതോടെ ഇവിടേക്ക് മാറ്റുകയായിരുന്നു.
