റാന്നി : ആർഎസ്എസ് അജണ്ട കേരളത്തിൽ നടപ്പിലാക്കുവാൻ ശ്രമിക്കുന്ന കേരള ഗവർണർ രാജേന്ദ്ര അർലേഖറിനെ രാഷ്ട്രപതി തിരികെ വിളിക്കണമെന്ന് കേരള കോൺഗ്രസ് (എം) റാന്നി നിയോജകമണ്ഡലം കമ്മിറ്റി ആവശ്യപ്പെട്ടു. പരിസ്ഥിതി ദിനാചരണവുമായി ബന്ധപ്പെട്ട് രാജ്ഭവനിൽ നടത്തുവാൻ നിശ്ചയിച്ച പരിപാടിയിൽ ആർഎസ്എസ് അജണ്ട നടപ്പിലാക്കുവാൻ ശ്രമിച്ച ഗവർണറുടെ നടപടി അങ്ങേയറ്റം പ്രതിഷേധാർഹവും അപലപനീയവും ആണെന്ന് യോഗം കുറ്റപ്പെടുത്തി. മതേതര മൂല്യങ്ങൾ ഉയർത്തിപ്പിടിക്കുന്ന കേരള സംസ്ഥാനത്ത് യാതൊരുതരത്തിലുള്ള വർഗീയ അജണ്ടകളും നടപ്പിലാക്കുവാൻ സമ്മതിക്കുകയില്ല എന്നും കേരള കോൺഗ്രസ് (എം ) പറഞ്ഞു.
പരിസ്ഥിതി ദിനാചരണവുമായി ബന്ധപ്പെട്ട പരിപാടിയിൽ കൃഷിവകുപ്പ് മന്ത്രി പി പ്രസാദ് സ്വീകരിച്ച നിലപാട് അഭിനന്ദനാർഹമാണെന്ന് യോഗം പറഞ്ഞു. കേരള കോൺഗ്രസ് (എം) സംസ്ഥാന സ്റ്റിയറിംഗ് കമ്മിറ്റി അംഗം അഡ്വ. മനോജ് മാത്യു യോഗം ഉദ്ഘാടനം ചെയ്തു. നിയോജകമണ്ഡലം പ്രസിഡന്റ് ജോർജ് എബ്രഹാം അധ്യക്ഷത വഹിച്ചു. അഡ്വ. ബോബി കാക്കനാപള്ളിൽ, ലിജോ വാളനാംകുഴി, ബെഹനാൻ ജോസഫ്, റിന്റോ തോപ്പിൽ,ടോമ്മി വടക്കേമുറി, ടോം ആയല്ലൂർ,സണ്ണി ഇടയാടി, ടിബു പുരക്കൽ, മാത്യുകുട്ടി ഏഴാചേരിൽ, കോശി എബ്രഹാം, എൻ എസ് ശോഭന, ജോർജ്കുട്ടി ഏഴുമറ്റൂർ എന്നിവർ പ്രസംഗിച്ചു.
