മുഖത്ത് ടാൻ വരുന്നത് സ്വാഭാവികമാണ്. അമിതമായി വെയിൽ ഏൽക്കുന്നതും അതുപോലെ അധികം ശ്രദ്ധ നൽകാതിരിക്കുമ്പോഴൊക്കെ ഇത്തരത്തിൽ സംഭവിക്കാറുണ്ട്. ചർമ്മത്തിൻ്റെ ഭംഗി നഷ്ടപ്പെടാനുള്ള പ്രധാന കാരണങ്ങളിൽ ഒന്നാണ് . പുറത്ത് പോകുമ്പോഴും വീട്ടിലിരിക്കുമ്പോഴുമൊക്കെ മുഖത്ത് സൺ സ്ക്രീൻ പുരട്ടേണ്ടത് വളരെ പ്രധാനമാണ്. അമിതമായി വെയിൽ ഏൽക്കുന്ന ജോലിയിൽ ഏർപ്പെടുന്നവരും പ്രത്യേകം ശ്രദ്ധിക്കണം. ഇത്തരത്തിൽ സൺ ടാൻ മാറ്റാൻ സഹായിക്കുന്ന ഒരു അടിപൊളി ഫേസ് പായ്ക്കാണ് ഇപ്പോൾ സോഷ്യൽ മീഡിയയിൽ വൈറലായി കൊണ്ടിരിക്കുന്നത്. വളരെ സിമ്പിളായി കുറച്ച് ചേരുവകൾ ഉപയോഗിച്ച് ഈ ഫേസ് മാസ്ക് തയാറാക്കാൻ സാധിക്കും. മുട്ടയുടെ വെള്ളയാണ് ഇതിലെ പ്രധാനി.
പ്രായമാകുന്നതിൻ്റെ എല്ലാ ലക്ഷണങ്ങളെയും ഇല്ലാതാക്കാൻ സഹായിക്കുന്നതാണ് മുട്ടയുടെ വെള്ള. പ്രോട്ടീൻസ്, വൈറ്റമിൻ ബി എന്നിവയൊക്കെ ചർമ്മത്തെ സംരക്ഷിക്കാൻ ഏറെ നല്ല ഘടകങ്ങളാണ്. ചർമ്മം അയഞ്ഞ് തൂങ്ങുന്നതിനെ വേഗത്തിൽ മാറ്റിയെടുക്കാൻ മുട്ടയുടെ വെള്ള വളരെയധികം സഹായിക്കാറുണ്ട്. കരിവാളിപ്പ് മാറ്റി ചർമ്മത്തെ നല്ല മൃദുവും തിളക്കവുമുള്ളതാക്കാനും മുട്ടയുടെ വെള്ള സഹായിക്കാറുണ്ട്. ഇത് ഉപയോഗിക്കുന്നത് വലിയ രീതിയിലുള്ള മാറ്റങ്ങൾ ചർമ്മത്തിൽ കാണിക്കും. ചർമ്മം തിളങ്ങാൻ ഏറെ നല്ലതാണ് തേൻ. ആൻ്റി ബാക്ടീരിയൽ ഗുണങ്ങൾ ഇതിൽ ധാരാളമായി അടങ്ങിയിട്ടുണ്ട്. ചർമ്മത്തെ നന്നായി മോയ്ചറൈസ് ചെയ്യാനും അതുപോലെ ആവശ്യത്തിന് ജലാംശം നൽകാനും തേൻ സഹായിക്കാറുണ്ട്. അതുപോലെ മുഖക്കുരുവും അതിൻ്റെ പാടുകളുമൊക്കെ വേഗത്തിൽ മാറ്റാൻ തേൻ സഹായിക്കാറുണ്ട്. ചർമ്മത്തിന് വേഗത്തിൽ തിളക്കം നൽകാനുള്ള മാർഗമാണ് തേൻ ഉപയോഗിക്കുന്നത്. ഇത് ചർമ്മത്തെ നല്ല രീതിയിൽ സംരക്ഷിക്കാറുണ്ട്.
ചർമ്മത്തിന് ഏറെ നല്ലതാണ് കാപ്പിപൊടി. ഇതിലെ ആൻ്റി ഏജിംഗ് ഘടകങ്ങൾ ചർമ്മത്തിലെ പാടുകളും വരകളുമൊക്കെ മാറ്റാൻ വളരെ നല്ലതാണ്. മാത്രമല്ല മുഖത്തെ കരിവാളിപ്പ് നീക്കാൻ ഏറ്റവും നല്ലതാണ് കാപ്പിപൊടി. ഇതിൽ ധാരാളം ആൻ്റി ഓക്സിഡൻ്റുകൾ അടങ്ങിയിട്ടുണ്ട്. മാത്രമല്ല ചർമ്മത്തിലുണ്ടാകുന്ന വീക്കം, ഡാർക് സർക്കിൾസ് എന്നിവയൊക്കെ ഇല്ലാതാക്കാനും കാപ്പിപൊടി വളരെയധികം സഹായിക്കാറുണ്ട്. ചർമ്മത്തിൽ നല്ലൊരു എക്സ്ഫോളിയേറ്ററായി പ്രവർത്തിക്കാനും മൃതകോശങ്ങളെ പുറന്തള്ളാനും കാപ്പിപൊടി സഹായിക്കാറുണ്ട്. ചർമ്മത്തിൻ്റെ നല്ല സുഹൃത്താണ് മഞ്ഞൾപ്പൊടി. ഇതിൽ അടങ്ങിയിരിക്കുന്ന കുർക്കുമിൻ ചർമ്മത്തിന് വളരെ നല്ലതാണ്. ആൻ്റി ബാക്ടീരിയൽ, ആൻ്റി ഇൻഫ്ലമേറ്ററി ഗുണങ്ങൾ മഞ്ഞളിൽ ധാരാളമായി അടങ്ങിയിട്ടുണ്ട്. ചർമ്മത്തിലെ നിറ വ്യത്യാസം, കരിവാളിപ്പ്, ഡാർക് സ്പോട്ടുകൾ എന്നിവയ്ക്ക് ഒക്കെയുള്ള ശാശ്വത പരിഹാരമാണ് മഞ്ഞൾ എന്ന് തന്നെ പറയാം. കൂടാതെ ഫ്രീ റാഡിക്കലുകൾ മൂലമുണ്ടാകുന്ന ചർമ്മത്തിലെ കേടുപാടുകൾ മാറ്റാനും മഞ്ഞൾ സഹായിക്കാറുണ്ട്.
ഇതിനായി ആദ്യം ഒരു മുട്ടയുടെ വെള്ള എടുക്കുക. ഇനി ഇതിലേക്ക് ഒരു ടേബിൾ സ്പൂൺ കാപ്പിപൊടിയും അൽപ്പം തേനും മഞ്ഞളും ചേർത്ത് നന്നായി യോജിപ്പിക്കുക. ഇനി ഈ മാസ്കിൽ നിന്ന് കുറച്ച് മുഖത്ത് എടുത്ത് തേച്ച് പിടിപ്പിക്കാം അതിന് ശേഷം ടിഷ്യൂ പേപ്പർ ഉപയോഗിച്ച് മുഖം കവർ ചെയ്യുക. അത് കഴിഞ്ഞ് ബാക്കിയുള്ള പായ്ക്ക് കൂടി അതിൻ്റെ മുകളിലേക്ക് തേച്ച് പിടിപ്പിച്ച് മാസ്ക് പോലെ വയ്ക്കാം. മാസ്ക് നന്നായി ഉണങ്ങിയ ശേഷം ഈ ടിഷ്യു പതുക്ക് പീൽ ഓഫ് ചെയ്ത് കളയാവുന്നതാണ്. 15 മുതൽ 20 മിനിറ്റ് ആകുമ്പോഴേക്കും മുഖത്ത് മാസ്ക് നന്നായി ഉണങ്ങിയുട്ടുണ്ടാവും. പായ്ക്കിടുന്നതിന് മുൻപ് പാച്ച് ടെസ്റ്റ് ചെയ്യാൻ മറക്കരുത്.
