തിരുവല്ല : പത്തനംതിട്ട ജില്ലാ ബാഡ്മിന്റണ് (ഷട്ടിൽ) അസോസിയേഷന്റെ ആഭിമുഖ്യത്തിൽ സംഘടിപ്പിക്കുന്ന യോനക്സ് സണ്റൈസ് മുത്തൂറ്റ് എം ക്രെഡ് ആള് കേരള സീനിയര് റാങ്കിംഗ് ബാഡ്മിന്റണ് ടൂര്ണമെന്റ് 2026 ജൂലൈ 22ന് തിരുവല്ലയിലെ പ്രൈം സ്പോർട്സ് സെന്ററിൽ തുടക്കമാകും. ജൂലൈ 22 മുതൽ 26 വരെ നടക്കുന്ന ടൂർണമെന്റില് കേരളത്തിലെ വിവിധ ജില്ലകളിൽ നിന്നായി നൂറുകണക്കിന് മുൻനിര താരങ്ങൾ വിവിധ ഇനങ്ങളിൽ മാറ്റുരയ്ക്കും. 22 ന് രാവിലെ 10 മണിക്ക് തിരുവല്ല എം.എല്.എ അഡ്വ.വര്ഗീസ് മാമ്മന് ടൂര്ണമെന്റ് ഉദ്ഘാടനം ചെയ്യും.
ചടങ്ങിൽ കേരള ബാഡ്മിന്റൺ (ഷട്ടിൽ) അസോസിയേഷൻ സെക്രട്ടറി മുഹമ്മദ് താരിഖ് മുഖ്യാതിഥിയായിരിക്കും. മുത്തൂറ്റ് എം.ക്രെഡ് ചെയർമാൻ റോയ് എം.മാത്യു മുത്തൂറ്റ്, തിരുവല്ല നഗരസഭ ചെയർപേഴ്സൺ ലേഖ എസ്., ജില്ലാ സ്പോർട്സ് കൗൺസിൽ വൈസ് പ്രസിഡന്റ് ഡോ. റെജിനോൾഡ് വർഗീസ്, ജില്ലാ ഒളിമ്പിക് അസോസിയേഷൻ പ്രസിഡന്റ് അഡ്വ.പ്രകാശ് ബാബു, കേരള ബാഡ്മിന്റൺ (ഷട്ടിൽ) അസോസിയേഷൻ ട്രഷറാർ ടി.ബിനുരാജ് എന്നിവർ സംസാരിക്കും.
