പത്തനംതിട്ട : ജീവനക്കാരുടെ വിവിധ ആവശ്യങ്ങൾ ഉന്നയിച്ചുകൊണ്ട് ജോയിന്റ് കൗൺസിലിന്റെ നേതൃത്വത്തിൽ അധ്യാപക സർവീസ് സംഘടന സമരസമിതി പത്തനംതിട്ട കളക്ടറേറ്റിലേക്ക് മാർച്ചും ധര്ണ്ണയും നടത്തി. സമരസമിതി കൗൺസിൽ വൈസ് ചെയർമാന് പി. ശ്രീകുമാർ സമരം ഉദ്ഘാടനം ചെയ്തു. ജനങ്ങളെ തെറ്റിദ്ധരിപ്പിക്കുന്ന ധവള പത്രത്തിലൂടെ ജീവനക്കാരുടെ ആനുകൂല്യങ്ങൾ കവർന്നെടുക്കുവാനുള്ള നീക്കം സർക്കാർ അവസാനിപ്പിക്കണമെന്നും വിവിധ വകുപ്പുകളിൽ നടക്കുന്ന മാനദണ്ഡവിരുദ്ധ സ്ഥലം മാറ്റങ്ങൾ നിർത്തണമെന്നും പി.ശ്രീകുമാര് ആവശ്യപ്പെട്ടു.
പന്ത്രണ്ടാം ശമ്പള പരിഷ്കരണ ആനുകൂല്യങ്ങൾ ജീവനക്കാർക്ക് ഉറപ്പാക്കുക, പങ്കാളിത്ത പെൻഷൻ പദ്ധതി പിൻവലിക്കുക, കുടിശ്ശികയായ ക്ഷാമബത്ത അടിയന്തിരമായി ലഭ്യമാക്കുക, മെഡിസെപ്പ് പദ്ധതിയിലെ അപാകതകൾ പരിഹരിക്കുക, മാനദണ്ഡവിരുദ്ധ സ്ഥലം മാറ്റങ്ങൾ അവസാനിപ്പിക്കുക, കേന്ദ്രസർക്കാരിന്റെ ജനദ്രോഹനയങ്ങൾ തിരുത്തുക തുടങ്ങിയ മുദ്രാവാക്യങ്ങൾ ഉന്നയിച്ചാണ് മാര്ച്ചും ധര്ണ്ണയും നടത്തിയത്. യോഗത്തില് കെ.ജി.ഒ.എഫ് ജില്ലാ പ്രസിഡന്റ് പുഷ്പ എസ്. അധ്യക്ഷത വഹിച്ചു. ജോയിന്റ് കൗൺസിൽ ജില്ലാ സെക്രട്ടറി ജി.അഖിൽ സ്വാഗതം ആശംസിച്ചു. സ്റ്റേറ്റ് സർവീസ് പെൻഷനേഴ്സ് കൗൺസിൽ ജില്ലാ സെക്രട്ടറി തുളസീധരൻ നായർ പി., ജോയിന്റ് കൗൺസിൽ സംസ്ഥാന കമ്മിറ്റി അംഗം ആർ.മനോജ് കുമാർ, ജോയിന്റ് കൗൺസിൽ ജില്ലാ പ്രസിഡന്റ് സി.അനീഷ് കുമാർ, പി.എസ് മനോജ് കുമാർ, കെ.ശിവാനന്ദൻ, ഹരിഹരൻ ആർ.പിള്ള, മഞ്ജു എബ്രഹാം, ജെ.സിനി, മഹേഷ്.ബി, എ.ഷാജഹാൻ, കെ.അനുരാജ്, സി.ഡാനിയേൽ കുട്ടി തുടങ്ങിയവര് സംസാരിച്ചു.
