ബംഗളൂരു : പ്രതിശ്രുത വധുവായ യുവതിയുടെ നഗ്ന ചിത്രങ്ങള് സമൂഹമാധ്യമങ്ങളില് പ്രചരിപ്പിച്ച ഡോക്ടറെ യുവതിയും സുഹൃത്തുക്കളും ചേര്ന്ന് കൊലപ്പെടുത്തി. ചെന്നൈ സ്വദേശിയായ ഡോക്ടര് വികാഷ് രാജന് (27) ആണ് കൊല്ലപ്പെട്ടത്. യുവതിയും സുഹൃത്തുക്കളായ സുശീല്, ഗൗതം, സൂര്യ എന്നിവരും ചേര്ന്നാണ് കൊലനടത്തിയത്.
യുക്രൈനില് എംബിബിഎസ് പൂര്ത്തിയാക്കിയ വികാഷ് രണ്ട് വര്ഷം ചെന്നൈയില് ജോലി ചെയ്ത ശേഷം ബംഗളൂരുവിലേക്ക് എത്തിയതാണ്. സുഷീലിന്റെ വീട്ടില് വെച്ച് കൊലപാതകം നടത്തുകയായിരുന്നു. മര്ദനമേറ്റ വികാഷിനെ ആശുപത്രിയില് പ്രവേശിപ്പിച്ചെങ്കിലും മരിക്കുകയായിരുന്നു.
വികാഷും യുവതിയും രണ്ട് വര്ഷമായി സൗഹൃദത്തിലായിരുന്നു. പിന്നീട് ബന്ധുക്കള്ചേര്ന്ന് ഇവരുടെ വിവാഹത്തിന് അനുമതി നല്കുകയായിരുന്നു. പിന്നീട് വികാഷ് മറ്റൊരു സുഹൃത്തിന്റെ പേരില് വ്യാജ അക്കൗണ്ട് നിര്മിച്ച് യുവതിയുടെ ചിത്രങ്ങള് ഇയാള് പങ്കുവെക്കുകയായിരുന്നു.
വികാഷ് തമിഴ്നാട്ടിലെ സുഹൃത്തുക്കള്ക്ക് ഈ ചിത്രങ്ങള് അയച്ചുകൊടുക്കുകയും ചെയ്തു. ഇന്സ്റ്റഗ്രാമില് തന്റെ നഗ്ന ചിത്രങ്ങള് കണ്ട യുവതി ഞെട്ടുകയായിരുന്നു. തുടര്ന്ന് വികാഷിനോട് ഇത് ചോദിച്ചപ്പോള് താന് തമാശയ്ക്ക് ചെയ്തതെന്നായിരുന്നു മറുപടി.
സുഹൃത്തായ സുശീലിനോട് ഇക്കാര്യം യുവതി വെളിപ്പെടുത്തുകയും തുടര്ന്ന് വികാഷിനെ വീട്ടിലേക്ക് വിളിച്ചുവരുത്തി മര്ദ്ദിക്കുകയായിരുന്നു. ഗുരുതരമായി പരിക്കേറ്റതാണ് മരണത്തിന് കാരണം. ഇവര് തന്നെയാണ് പിന്നീട് വികാഷിനെ ആശുപത്രിയില് എത്തിച്ചതും എന്നാണ് പോലീസ് പറയുന്നത്.
