കോന്നി : സംസ്ഥാനത്തെ ഏറ്റവും പ്രായം കുറഞ്ഞ പഞ്ചായത്ത് പ്രസിഡൻ്റ് അരുവാപ്പുലം പഞ്ചായത്ത് പ്രസിഡൻ്റ് രേഷ്മ മറിയം റോയിയും ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷൻ വർഗ്ഗീസ് ബേബിയും വിവാഹിതരായി. ഊട്ടുപ്പാറ തുണ്ടിയാംകുളത്ത് റോയി ടി മാത്യുവിന്റെയും മിനി റോയിയുടെയും ഇളയ മകളാണ് രേഷ്മ മറിയം റോയി. സിപിഐ എം അരുവാപ്പുലം ലോക്കൽ കമ്മിറ്റി അംഗം, ഡിവൈഎഫ്ഐഐ ജില്ലാ കമ്മിറ്റി അംഗം, എസ് എഫ് ഐ ജില്ലാ കമ്മിറ്റി അംഗം എന്നീ നിലകളിൽ പ്രവർത്തിക്കുന്നു.
വരൻ വർഗ്ഗീസ് ബേബി സിപിഐ എം കോന്നി ഏരിയ കമ്മറ്റി അംഗം, കെ എസ് കെ ടി യു ഏരിയ പ്രസിഡൻ്റ്, ഇ എം എസ് ചാരിറ്റബിൾ സൊസൈറ്റി സാന്ത്വന പരിചരണ വിഭാഗം കൺവീനർ എന്നീ നിലകളിൽ പ്രവർത്തിക്കുന്നു. അരുവാപ്പുലം പാർലിവടക്കേതിൽ പി എം ബേബിയുടെയും സാറാമ്മ ബേബിയുടെയും ഇളയ മകനാണ് വർഗ്ഗീസ് ബേബി. വ്യാഴാഴ്ച്ച പകൽ 11.30 പൂവൻപാറ ശാലേം മർത്തോമാ ചർച്ചിൽ വെച്ച് ഇരുവരും വിവാഹിതരായി. ശനിയാഴ്ച്ച വൈകീട്ട് 3 മുതൽ 7വരെ പ്രമാടംഗ രാജീവ് ഗാന്ധി ഇൻഡോർ സ്റ്റേഡിയത്തിൽ വെച്ച് വിവാഹ സത്കാരം നടക്കും.