കോവളം : വിഴിഞ്ഞം ഉച്ചക്കടയില് സ്വര്ണപ്പണയ സ്ഥാപനയുടമയായ വയോധികനെ ബൈക്കിടിപ്പിച്ചശേഷം ബാഗിലുണ്ടായിരുന്ന 20 പവന്റെ സ്വര്ണവും മൂന്നേമുക്കാല് ലക്ഷം രൂപയും തട്ടിയെടുത്ത് കടന്ന സംഭവത്തില് മൂന്നുപേരെ വിഴിഞ്ഞം പോലീസ് അറസ്റ്റ് ചെയ്തു. ആറ്റുകാല് പുത്തന്കോട്ട വട്ടവിള വലിയവിള മേലേ വീട്ടില് നവീന് (28), കോട്ടുകാല് തുണ്ടുവിള വീട്ടില് വിനീത് (34), കോട്ടുകാല് വട്ടവിള ദര്ഭവിള ഗോകുല് നിവാസില് ഗോകുല് (23) എന്നിവരെയാണ് അറസ്റ്റ് ചെയ്തത്. ഇവര് സഞ്ചരിച്ചിരുന്ന കാറും മോഷണ മുതല് ഉപയോഗിച്ച് പ്രതികളിലൊരാളായ ഗോകുല് പണയമായെടുത്ത ബൈക്കും കസ്റ്റഡിയിലെടുത്തു.
പിടിയിലായവരുടെ കൂട്ടാളികളായ ചിലരെ തിരിച്ചറിഞ്ഞിട്ടുണ്ടെന്നും ഇവര്ക്കായി അന്വേഷണം ഊര്ജിതമാക്കിയതായും വിഴിഞ്ഞം പോലീസ് പറഞ്ഞു. കഴിഞ്ഞമാസം 27ന് രാത്രി എട്ടരയോടെയായിരുന്നു സംഭവം. ഉച്ചക്കട ചപ്പാത്ത് റോഡില് വട്ടവിള ജങ്ഷനില് സുകൃത ഫൈനാന്സ് നടത്തുന്ന കോട്ടുകാല് ഉദിനിന്നവിള പുത്തന് വീട്ടില് പദ്മകുമാറില് (60) നിന്നാണ് സംഘം പണവും സ്വര്ണവുമടങ്ങിയ ബാഗ് തട്ടിയെടുത്തത്. വട്ടവിള ജങ്ഷനിലെ സ്വര്ണപ്പണയ സ്ഥാപനം പൂട്ടിയശേഷം ജ്യേഷ്ടസഹോദരനായ മോഹന്കുമാറിനൊപ്പം തൊട്ടകലെയുള്ള വീട്ടിലേക്ക് നടന്നുപോകവെയായിരുന്നു ആക്രമണവും കവര്ച്ചയും.
ഫോര്ട്ട് അസി.കമീഷണര് എസ്.ഷാജി, വിഴിഞ്ഞം എസ്.എച്ച്.ഒ പ്രജീഷ് ശശി, എസ്.ഐമാരായ കെ.എല് സമ്പത്ത്, ജി.വിനോദ്, ലിജോ പി.മണി, പ്രസാദ്, സീനിയര് സി.പി.ഒ സെല്വരാജ്, സി.പി.ഒ പ്രകാശ്, രാമു, ലജീവ് എന്നിവരാണ് പ്രതികളെ അറസ്റ്റുചെയ്തത്.