എരുമേലി : ശബരിമല തീര്ഥാടകരുടെ വാഹനത്തില് മോഷണം നടന്നതായി പരാതി. പണവും മൊബൈല് ഫോണുകളും നഷ്ടപ്പെട്ടു. തമിഴ്നാട് സ്വദേശികളായ അയ്യപ്പഭക്തരുടെ 50,000 രൂപയും ഏഴ് മൊബൈല് ഫോണുകളുമാണ് മോഷണം പോയത്. ശനിയാഴ്ച രാവിലെ എരുമേലി ഒരുങ്കല് കടവില് ആണ് സംഭവം. മണിമലയാറ്റിലെ ഒരുങ്കല്കടവില് തീര്ഥാടകര് കുളിക്കാന് പോയ സമയത്ത് വാഹനത്തിന്റെ ചില്ല് തകര്ത്താണ് മോഷണം നടത്തിയത്.
സ്വകാര്യ പറമ്പിനോട് ചേര്ന്ന് വാഹനം പാര്ക്ക് ചെയ്ത ശേഷമാണ് തീര്ഥാടകര് കുളിക്കാന് പോയത്. തിരികെ വരുമ്പോള് വാഹനത്തിന്റെ ചില്ല് തകര്ത്ത നിലയില് കണ്ടെത്തുകയായിരുന്നു. തുടര്ന്ന് നടത്തിയ പരിശോധനയില് ആണ് തീര്ഥാടകരുടെ ബാഗുകളില് സൂക്ഷിച്ച മൊബൈല് ഫോണുകളും പണവും നഷ്ടപ്പെട്ടതായി അറിയുന്നത്. തീര്ഥാടകരുടെ പരാതിയെ തുടര്ന്ന് എരുമേലി എസ്.എച്ച്.ഒ എം.മനോജ്, എസ്.ഐ അനീഷ് എന്നിവരുടെ നേതൃത്വത്തില് പരിശോധന നടത്തി. വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി തെളിവ് ശേഖരിച്ചു.
