പത്തനംതിട്ട : പഴയ ബസ്സ് സ്റ്റാന്റിലെ കച്ചവട സ്ഥാപനങ്ങൾ കുത്തി തുറന്ന് നടത്തുന്ന മോഷണങ്ങൾക്കെതിരെ വ്യാപാരി വ്യവസായി സമിതി പത്തനംതിട്ട യൂണിറ്റ് ശക്തമായി പ്രതിഷേധിച്ചു. ഇവിടെ പ്രവർത്തിക്കുന്ന ജെം ടെയിലേഴ്സ്, ഗുരുവായൂർ പർപ്പടക സ്റ്റോർ , ആദം ട്രേഡിംഗ് തുടങ്ങിയ സ്ഥാപനങ്ങളിലെ പൂട്ട് കുത്തി തുറന്നാണ് കവർച്ച നടത്തിയിട്ടുള്ളത്. തയ്ക്കാൻ സൂക്ഷിച്ചിരുന്ന തുണികളും പർപ്പടക കടയിൽ നിന്നും 5000 രൂപയും മോഷ്ടിക്കപ്പെട്ടു. ആദം ട്രേഡിംഗ് കട അടിച്ച് തകർത്ത് താഴ് പൊട്ടിച്ച നിലയിലുമാണ് ഉള്ളത്.
കടകൾ അടച്ച് പോയി കഴിഞ്ഞാൽ സ്ഥാപനങ്ങൾക്ക് യാതൊരു സുരക്ഷിതത്വവും ലഭിക്കുന്നില്ല. പോലീസ് രാത്രികാല പെട്രോളിംഗ് ശക്തിപ്പെടുത്തുകയും സി സിടിവി കാമറ സ്ഥാപിക്കുകയും കേടായ തെരുവ് വിളക്കുകൾ മാറ്റി പുതിയത് സ്ഥാപിച്ച് സുരക്ഷിതത്വം ഉറപ്പാക്കണമെന്നും യോഗം ആവശ്യപ്പെട്ടു. പ്രതിഷേധ യോഗം ജില്ലാ വൈസ് പ്രസിഡന്റ് അബ്ദുൽ റഹീം മാക്കാർ ഉദ്ഘാടനം ചെയ്തു. യൂണിറ്റ് വൈസ് പ്രസിഡന്റ് ഹസീബ് അധ്യക്ഷത വഹിച്ചു. ജില്ലാ ജോയിന്റ് സെക്രട്ടറി ഗീവർഗ്ഗീസ് പാപ്പി, ജില്ലാ ട്രഷറാർ ജയപ്രകാശ്, യൂണിറ്റ് സെക്രട്ടറി ബാബു മേപ്രത്ത്, ഷിബു ചെറിയാൻ തുടങ്ങിയവർ സംസാരിച്ചു.
