വണ്ടിപ്പെരിയാര്‍: ഗ്രാമ്പിയില്‍ ഒഴുക്കില്‍പെട്ട് കാണാതായ ആദിവാസി ബാലനുവേണ്ടി തിരച്ചില്‍ തുടരുന്നു. കുടംപുളി ശേഖരിക്കാന്‍ ഗ്രാമ്പി വനത്തില്‍ പോയി മടങ്ങിവരുന്ന വഴിയിലാണ് അജിത്തിനെ (12) കാണാതാകുന്നത്.പിതാവ് മാധവനും മാതാവ് ഷൈലക്കുമൊപ്പമായിരുന്നു കുട്ടി വനത്തിലേക്ക് പോയത്. പുഴ മുറിച്ചുകടക്കുന്നതിനിടെയാണ് അപകടം ഉണ്ടായത്.നിറഞ്ഞൊഴുകുന്ന പുഴയിലാണ് കുട്ടി ഒഴുക്കില്‍പെട്ടത്. വെള്ളിയാഴ്ച വൈകീട്ടുവരെ തിരച്ചില്‍ നടത്തിയെങ്കിലും കണ്ടെത്താനായിരുന്നില്ല.
മൂന്ന് കിലോമീറ്ററോളം വനത്തിലൂടെ യാത്ര ചെയ്താലേ കുട്ടി ഒഴുക്കില്‍പെട്ട ഭാഗത്ത് എത്താനാകൂ. വെള്ളിയാഴ്ച ഇരുട്ടിയതോടെ തിരച്ചില്‍ നിര്‍ത്തിവെക്കുകയായിരുന്നു.എന്‍.ഡി.ആര്‍.എഫ്, പൊലീസ്, ഫയര്‍ഫോഴ്‌സ്, ഫോറസ്റ്റ്, റവന്യൂ സംഘം സംയുക്തമായി ശനിയാഴ്ചയും തിരച്ചില്‍ നടത്തി. രണ്ട് ടീമായി തിരിഞ്ഞ് രാവിലെ ഏഴ് മുതല്‍ തിരച്ചില്‍ നടത്തി. ഒരുസംഘം പരുന്തുംപാറക്ക് താഴെ ഭാഗത്തും ഒരുസംഘം പുറക്കയം ഭാഗത്തുമാണ് തിരയുന്നത്.
