തിരുവനന്തപുരം: പെരുമാതുറയില് മീന്പിടിക്കാന് പോയ വള്ളം മറിഞ്ഞ് രണ്ട് മത്സ്യത്തൊഴിലാളികളെ കാണാതായി. ചേരമാന് തുരുത്ത് സ്വദേശികളായ സഫീര്, സുനീര് എന്നിവരെയാണ് കാണാതായത്. രാവിലെ മുതലപ്പൊഴിയില് നിന്നും പോയ വള്ളം ശക്തമായ കാറ്റിലും തിരമാലയിലും പെട്ട് മറിയുകയായിരുന്നു. ഒപ്പമുണ്ടായിരുന്ന മറ്റൊരു മത്സ്യത്തൊഴിലാളി അന്സാരി നീന്തി രക്ഷപ്പെട്ടു. കോസ്റ്റ് ഗാര്ഡും മത്സ്യത്തൊഴിലാളികളും തെരച്ചില് ശക്തമാക്കി
സംസ്ഥാനത്ത് മഴ ജാഗ്രത തുടരുകയാണ്. മധ്യ കേരളത്തിലും വടക്കന് കേരളത്തില് മഴ തുടരും. അടുത്ത 3 മണിക്കൂറില് കേരളത്തില് എല്ലാ ജില്ലകളിലും ഒറ്റപ്പെട്ടയിടങ്ങളില് മിതമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. എട്ട് ജില്ലകളില് യെല്ലോ അലര്ട്ടുണ്ട്. കോട്ടയം, ഇടുക്കി, തൃശ്ശൂര്, പാലക്കാട്, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് ഇന്ന് യെല്ലോ അലര്ട്ട്. തീവ്ര മഴമുന്നറിയിപ്പുകളില്ലെങ്കിലും കഴിഞ്ഞ ദിവസങ്ങലില് ശക്തമായ മഴ കിട്ടിയ പ്രദേശങ്ങളില് അതീവ ജാഗ്രത തുടരണം. ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദവും അറബിക്കടലില് നിന്നുള്ള പടിഞ്ഞാറന് കാറ്റുമാണ് മഴ തുടരുന്നതിന് കാരണം.
ജലനിരപ്പ് ഉയര്ന്നതോടെ ഇടുക്കി അണക്കെട്ട് വീണ്ടും തുറന്നു. റെഡ് അലര്ട്ട് പ്രഖ്യാപിച്ചതിന് പിന്നാലെയാണ് ഡാം തുറന്നത്. ചട്ടപ്രകാരം മൂന്ന് തവണ സൈറണ് മുഴക്കിയ ശേഷം രാവിലെ പത്ത് മണിയോടെ ഡാം തുറന്നത്. ചെറുതോണി അണക്കെട്ടിന്റെ ഒരു ഷട്ടര് 70 സെന്റീമീറ്റര് ഉയര്ത്തി അന്പത് ഘനമീറ്റര് വെള്ളം പെരിയാറിലേക്ക് ഒഴുക്കി വിടുകയാണ് ഇപ്പോള്. 2383.53 ആണ് നിലവിലെ അപ്പര് റൂള് കര്വ്. ഡാം തുറന്നാലും പെരിയാര് തീരത്തുള്ളവരുടെ വീടുകളിലേക്കൊന്നും വെള്ളം കയറില്ലെന്നാണ് ജില്ല ഭരണകൂടത്തിന്റെ വിലയിരുത്തല്. മുന്കരുതലായി 79 കുടുംബങ്ങള്ക്ക് നോട്ടീസ് നല്കിയിട്ടുണ്ട്. ക്യാന്പ് തുടങ്ങാന് 23 സ്ഥലങ്ങളും കണ്ടെത്തി. ഇടുക്കി, കഞ്ഞിക്കുഴി, തങ്കമണി, വാത്തിക്കുടി, ഉപ്പുതോട് വില്ലേജുകളില് അനൗണ്സ്മെന്റും നടത്തി.
