ചെങ്ങന്നൂര്: ക്ഷേത്രങ്ങളിലെ പൂജകള്ക്കിടയില് ഉണ്ടാകുന്ന തിരക്ക് മുതലെടുത്ത് മാലമോഷണം നടത്തിവന്ന തമിഴ്നാട് സ്വദേശികളായ മൂന്ന് സ്ത്രീകളെ ചെങ്ങന്നൂര് പോലീസ് അരസ്റ്റ് ചെയ്തു. കോയമ്പത്തൂര് പാപ്പനക്കല്പാളയം പള്ളിയാര്കോവില് തെരുവില് താമസക്കാരായ സാറ(40), വേലമ്മ(48), മേഘന (38) എന്നിവരാണ് പിടിയിലായത്. ഡിസംബര് ഒന്നിന് ചെങ്ങന്നൂര് ക്ഷേത്രത്തില് പ്രസാദം വാങ്ങാനുള്ള തിരക്കിനിടയില് ചെങ്ങന്നൂര് സ്വദേശിനിയായ സുമയുടെ കഴുത്തില് നിന്നും ഒന്നേമുക്കാല് പവന്റെ സ്വര്ണാഭരണമാണ് ഇവര് കവര്ന്നത്. ഇതിന്റെ സിസിടിവി ദൃശ്യങ്ങള് കേന്ദ്രീകരിച്ചാണ് പോലീസ് അന്വേഷണം തുടങ്ങിയത്. ഇതിന് ശേഷം പറയരുകാല ക്ഷേത്രത്തിലെ ഗണപതിഹോമത്തിനിടയില് രണ്ട് അമ്മമാരുടെ കഴുത്തില്നിന്നായി അഞ്ച് പവന്റെയും നാലുപവന്റെയും മാലകള് ഇവര് പൊട്ടിച്ചെടുത്തു കടന്നുകളഞ്ഞു.
കാരയ്ക്കാട് സ്വദേശിനിയായ പ്രിന്സിയുടെ കയ്യിലെ അരലക്ഷത്തോളം രൂപ ഇത്തരത്തില് ഇവര് ബസില് വച്ച് കവര്ന്നിട്ടുണ്ട്. ഈ പരാതിയിലും അന്വേഷണം നടന്നുവരികയായിരുന്നു. സ്ഥിരമായി ബസില് കയറി കൃത്രിമതിരക്ക് സൃഷ്ടിച്ച് യാത്രക്കാരുടെ ബാഗില് നിന്നും പണവും സ്വര്ണവും കവരുന്നത് ഇവരുടെ രീതിയാണ്. കേരളത്തിലെ ഇരുപതോളം സ്റ്റേഷനുകളിലായി നൂറോളം കേസുകള് ഇവര്ക്കെതിരെയുള്ളതായി പോലീസ് അറിയിച്ചു. കരുനാഗപ്പള്ളിയില് ബസില് മോഷണം നടത്തുന്നതിനിടയിലാണ് ഇവര് പിടിയിലായത്. ഹൈക്കോടതിയില് ഇവര്ക്കായി ഹാജരാകുന്നത് ലക്ഷങ്ങള് ഫീസ് വാങ്ങുന്ന പ്രമുഖ അഭിഭാഷകനാണെന്ന് അറിയുന്നു. സിഐ എ.സി. വിപിന്, എസ്ഐ പ്രദീപ്, എസ്ഐ സുരേഷ്കുമാര്, സിപിഒമാരായ ശ്യാംകുമാര്, റിനി, ബിന്ദു എന്നിവരാണ് അന്വേഷണസംഘത്തില് ഉണ്ടായിരുന്നത്.
