പത്തനംതിട്ട : തേക്കുതോട് സ്വദേശിനി ആയ രാജിയുടെ മരണത്തിലെ ദുരൂഹത അന്വേഷിക്കണമെന്ന് ആവശ്യപ്പെട്ട് രാജിയുടെ കുടുംബം നടത്തുന്ന സമരത്തിൻ്റെ അഞ്ചാം ദിവസം സത്യാഗ്രഹ സമരം ബിജെപി ജില്ലാ സെക്രട്ടറി വിഷ്ണു മോഹൻ ഉദ്ഘാടനം ചെയ്തു. സി പി എം പ്രവർത്തകരായ പ്രതികളെ സംരക്ഷിക്കുന്നത് കോന്നി എം എൽ എ ജനീഷ് കുമാർ ആണെന്ന് അദ്ധേഹം പറഞ്ഞു. ക്രിമിനൽ സംഘങ്ങൾ സിപിഎം ഭരണത്തിൻ്റെ മറവിൽ അഴിഞ്ഞാടുകയാണ്.
ഈ സംഘത്തിൽപ്പെട്ട ആളുകൾ ജനങ്ങളുടെ സ്വൈരജീവിതത്തിനു തന്നെ ഭീഷണി ആയി മാറിയിരിക്കുകയാണ്. രാജിയുടെ മരണത്തിൻ്റെ ഉത്തരവാദികളെ രക്ഷപ്പെടുത്താനുള്ള ശ്രമം അപലപനീയമാണ്, ഉന്നതതല അനേഷണം നടത്തി പ്രതികളെ നിയമത്തിനു മുൻപിൽ കൊണ്ടുവരാൻ ബന്ധപ്പെട്ടവർ തയ്യാറാവണമെന്നും ബിജെപി ആവശ്യപ്പെട്ടു. തണ്ണിത്തോട് പഞ്ചായത്ത് പ്രസിഡൻ്റ് പി ഡി ശശിധരൻ, ജനറൽ സെക്രട്ടറി റ്റി സി വിജയകുമാർ ജില്ലാ കമ്മിറ്റി അംഗം സുഭാഷ് എന്നിവർ പ്രസംഗിച്ചു.
