കോന്നി : ആരുവാപ്പുലം തേക്കുതോട്ടം മുക്ക് എം എൽ എ പടി റോഡിന്റെ തകർച്ച നാട്ടുകാരെ വലക്കുന്നു. ഭുവനെശ്വരി പടിയിലെ ചപ്പാത്ത് ഭാഗം തകർന്ന് കിടക്കാൻ തുടങ്ങിയിട്ട് കാലങ്ങൾ ഏറെയായി. റോഡിന് ഇരുവശവും ഓട നിർമ്മിക്കാത്തതിനാൽ മഴക്കാലത്ത് വെള്ളം ഒഴുകി പോകാതെ റോഡിൽ കെട്ടി നിൽക്കുന്നതാണ് റോഡ് തകർച്ചക്ക് കാരണമാകുന്നത് എന്ന് നാട്ടുകാർ പറയുന്നു. പലയിടത്തും വലിയ കുഴികൾ രൂപപ്പെട്ടതോടെ ഇരുചക്ര വാഹന യാത്രക്കാർ അപകടത്തിൽ പെടുന്നത് പതിവാണ്. വാഹനങ്ങൾക്ക് മാത്രമല്ല കാൽനട യാത്ര പോലും ഇവിടെ ദുരിതപൂർണ്ണമാണ്.
ചപ്പാത്തിലൂടെ കയറി ഇറങ്ങുന്ന വാഹനങ്ങൾ വെള്ളം കയറി നിന്ന് പോകുന്ന സംഭവങ്ങളും ഉണ്ടായിട്ടുണ്ട്. ഇത്രയും അപകട സാധ്യത ഉള്ള റോഡിൽ ഇത് തിരിച്ചറിയാൻ അധികൃതർ അപായ സൂചന ബോർഡുകളും സ്ഥാപിച്ചിട്ടില്ല. ഇതേ അവസ്ഥയാണ് രാധപടി പുളിഞ്ചാണി റോഡിന്റെയും. മൂന്ന് കിലോമീറ്ററോളം ദൂരം വരുന്നതും പുനലൂർ മൂവാറ്റുപുഴ പാതയിൽ ബന്ധിക്കുന്നതുമായ റോഡിൽ തകർച്ച നേരിടാൻ തുടങ്ങിയിട്ട് കാലങ്ങൾ കഴിഞ്ഞു.
പുനലൂർ മൂവാറ്റുപുഴ സംസ്ഥാന പാതയുടെ നിർമ്മാണപ്രവർത്തനങ്ങൾ നടക്കുന്നതിനാൽ വലിയ വാഹനങ്ങൾ ഉൾപ്പെടെ ഇതുവഴിയാണ് കടത്തി വിടുന്നത്. മുൻപ് എം എൽ എ ഫണ്ടിൽ നിന്ന് പണം അനുവദിച്ച് റോഡ് നിർമ്മാണം ആരംഭിച്ചിരുന്നു എങ്കിലും ഇടക്ക് വെച്ച് ഇതും നിർത്തി. റോഡിന്റെ ദുരവസ്ഥ പരിഹരിക്കാത്തതിൽ വലിയ പ്രതിഷേധത്തിൽ ആണ് നാട്ടുകാർ.