തിരുവനന്തപുരം : ഭരണഘടനാപദവിയിൽ ഇരിക്കുന്നവർ ജനങ്ങൾക്കിടയിൽ ഐക്യം ഊട്ടി ഉറപ്പിക്കാനാണ് പ്രവർത്തിക്കേണ്ടതെന്നും അതിന് വിരുദ്ധമായ സമീപനങ്ങൾ അപകടകരമാണെന്നും സിപിഐഎം പോളിറ്റ് ബ്യൂറോ അംഗം എം.എ. ബേബി. ക്രിസ്തുമസിന് പകരം വാജ്പേയിയുടെ ജന്മദിനം ആചരിക്കണമെന്ന് പറയുന്ന ഗവർണർമാർ ഉണ്ടാകുന്നു എന്നും അദ്ദേഹം ചൂണ്ടിക്കാട്ടി.
മനുഷ്യർക്കിടയിലെ ഐക്യം തകർക്കാനുള്ള ശ്രമങ്ങൾ രാജ്യത്ത് ശക്തമായി നടക്കുകയാണെന്നും, ബിജെപി ഭരിക്കുന്ന സംസ്ഥാനങ്ങളിൽ ഇത് വലിയ തോതിലാണെന്നും എം.എ. ബേബി പറഞ്ഞു. കേരളത്തിലും സംഘപരിവാർ ശക്തികൾ ഇത്തരം ശ്രമങ്ങൾ നടത്തുന്നുവെന്നതിന്റെ ഉദാഹരണമാണ് പാലക്കാട് ഉണ്ടായ സംഭവമെന്നും അദ്ദേഹം ചൂണ്ടിക്കാട്ടി. ക്രിസ്തുമസിനെ പോലും മതത്തിന്റെ പേരിൽ വേർതിരിക്കാൻ ശ്രമങ്ങൾ നടക്കുന്നതായും അദ്ദേഹം ചൂണ്ടിക്കാട്ടി.ഇതിനെതിരെ ജനങ്ങൾ സദാ ജാഗ്രത പാലിക്കണമെന്ന് അദ്ദേഹം ആഹ്വാനം ചെയ്തു.
