ദില്ലി: വിവാഹ ആഘോഷ വേദികളില്‍ സിനിമകളിലെ പാട്ടുകള്‍ അവതരിപ്പിക്കുന്നതിനും റെക്കോര്‍ഡിങ് കേള്‍പ്പിക്കുന്നതിനും നിയമതടസ്സമില്ല. ഇത് വ്യക്തമാക്കി കൊണ്ടുള്ള സര്‍ക്കുലര്‍ കേന്ദ്ര സര്‍ക്കാര്‍ ഇറക്കി. വര്‍ഷങ്ങളായി തര്‍ക്കവും നിയമപോരാട്ടവും നടക്കുന്ന വിഷയത്തിലാണു ഇപ്പോള്‍ കേന്ദ്ര വാണിജ്യ മന്ത്രാലയം സര്‍ക്കുലര്‍ ഇറക്കിയത്. ഇതിന്റെ പേരില്‍ ആര്‍ക്കും റോയല്‍റ്റി ആവശ്യപ്പെടാന്‍ കഴിയില്ല എന്നും സര്‍ക്കുലറില്‍ വ്യക്തമാക്കിയിട്ടുണ്ട്. പാട്ടുകള്‍ അനുവാദമില്ലാതെ ഉപയോഗിക്കുന്നതിനെതിരെ കോപ്പിറൈറ്റ് സൊസൈറ്റിയായ ഫോണോഗ്രാഫിക് പെര്‍ഫോമന്‍സ് ലിമിറ്റഡ് ദില്ലി ഹൈക്കോടതിയെ സമീപിച്ചിരുന്നു.
പകര്‍പ്പവകാശമുള്ള ഗാനങ്ങള്‍ പൊതുവേദികളില്‍ അവതരിപ്പിക്കുന്നതിന് ഇന്ത്യന്‍ പകര്‍പ്പവകാശനിയമ പ്രകാരം നിയന്ത്രണമുണ്ട്. എന്നാല്‍, മതപരമായ ചടങ്ങുകളിലും സര്‍ക്കാര്‍ പരിപാടികളിലും മുന്‍കൂര്‍ അനുമതിയോ റോയല്‍റ്റിയോ വേണ്ടെന്ന് നിയമത്തില്‍ തന്നെ സെക്ഷന്‍ 52 (1) -സെഡ് എയില്‍ വ്യക്തമാക്കുന്നു. മതപരമായ ചടങ്ങുകളില്‍ വിവാഹവും ബന്ധപ്പെട്ട ചടങ്ങുകളും ഉള്‍പ്പെടുമെന്നതിനാല്‍ പകര്‍പ്പവകാശം ബാധകമല്ലെന്നു കേന്ദ്രം വ്യക്തമാക്കി.
