ഇന്ത്യയിലെ മോട്ടോർസൈക്കിൾ വിപണിയിൽ ഇപ്പോൾ ആവശ്യക്കാർ ഏറി വരുന സെഗ്മെന്റാണ് 300 സിസിക്കും 450 സിസിക്കും ഇടയിലുള്ള ബൈക്കുകളുടേത്. അതുകൊണ്ട് തന്നെ മുൻനിര കമ്പനികളെല്ലാം ഈ വിഭാഗത്തിൽ കൂടുതൽ ബൈക്കുകൾ അവതരിപ്പിക്കാൻ ഒരുങ്ങുകയാണ്. റോയൽ എൻഫീൽഡിന് (Royal Enfield) ആധിപത്യമുള്ള സെഗ്മെന്റ് പിടിച്ചെടുക്കാൻ ടിവിഎസ്, ട്രയംഫ്, കെടിഎം, യമഹ, അപ്രീലിയ എന്നീ ബ്രാന്റുകൾ പുതിയ ബൈക്കുകൾ പുറത്തിറക്കും. ഇതിനെ പ്രതിരോധിക്കാൻ റോയൽ എൻഫീൽഡ് ഹിമാലയൻ 450യും വൈകാതെ എത്തും. ഇന്ത്യയിൽ അവതരിപ്പിക്കാൻ പോകുന്ന ഈ കരുത്തൻ ബൈക്കുകൾ നോക്കാം. ടിവിഎസ് അപ്പാച്ചെ ആർടിആർ 310 എന്ന പുത്തൻ ബൈക്ക് സെപ്റ്റംബർ 6ന് ഔദ്യോഗികമായി അവതരിപ്പിക്കും. ഈ മുൻനിര നേക്കഡ് സ്ട്രീറ്റ്ഫൈറ്റർ ബൈക്കിൽ ഡ്യുവൽ എൽഇഡി ഹെഡ്ലാമ്പ്, അപ്സൈഡ് ഡൌൺ ഫ്രണ്ട് ഫോർക്കുകൾ, മോണോഷോക്ക് റിയർ സസ്പെൻഷൻ, ടിഎഫ്ടി ഡിസ്പ്ലേ, റൈഡ് മോഡുകൾ, ഡ്യുവൽ ചാനൽ എബിഎസ് എന്നിങ്ങനെയുള്ള മികച്ച സവിശേഷതകളുണ്ട്. ഏകദേശം 2.5 ലക്ഷം രൂപ എക്സ് ഷോറൂം വിലയുമായിട്ടായിരിക്കും ബൈക്ക് വരുന്നത്. 312 സിസി ലിക്വിഡ് കൂൾഡ് എഞ്ചിനാണ് ബൈക്കിന് കരുത്ത് നൽകുന്നത്.
റോയൽ എൻഫീൽഡ് ഹിമാലയൻ 450 നവംബർ ആദ്യം ഇന്ത്യയിൽ അവതരിപ്പിക്കും. കമ്പനിയുടെ 450 സിസി എഞ്ചിനുമായി വരുന്ന ആദ്യത്തെ മോട്ടോർസൈക്കിളാണിത്. ഈ ഡ്യുവൽ പർപ്പസ് അഡ്വഞ്ചർ ടൂറർ മോട്ടോർസൈക്കിൾ പുതിയ 450 സിസി ലിക്വിഡ് കൂൾഡ് എഞ്ചിന്റെ കരുത്തിൽ പ്രവർത്തിക്കും. ഏകദേശം 40 ബിഎച്ച്പി പവർ നൽകുന്ന എഞ്ചിനൊപ്പം 6 സ്പീഡ് ട്രാൻസ്മിഷനും ഉണ്ടായിരിക്കും. ഓൾ എൽഇഡി ലൈറ്റിങ്, യുഎസ്ഡി ഫ്രണ്ട് ഫോർക്കുകൾ, ഓഫ്സെറ്റ് മോണോഷോക്ക്, പുതിയ ഡിജിറ്റൽ ക്ലസ്റ്റർ, സ്പ്ലിറ്റ് സീറ്റുകൾ തുടങ്ങിയ പ്രീമിയം സവിശേഷതകളും ഈ ബൈക്കിലുണ്ടാകും.
ട്രയംഫ് സ്പീഡ് 400ന് മികച്ച സ്വീകാര്യത ലഭിച്ചതിനാൽ തന്നെ ഒക്ടോബറിൽ കമ്പനി ബജാജുമായി സഹകരിച്ച് നിർമ്മിച്ച രണ്ടാമത്തെ ബൈക്കായ ട്രയംഫ് സ്ക്രാമ്പ്ളർ 400എക്സ് അവതരിപ്പിക്കും. 398 സിസി ലിക്വിഡ് കൂൾഡ് DOHC എഞ്ചിനുമായിട്ടാണ് ഈ ബൈക്ക് വരുന്നത്. 40 പിഎസ് പവറും 37.5 എൻഎം ടോർക്കും ഉത്പാദിപ്പിക്കുന്ന എഞ്ചിനാണ് ഇത്. സ്പീഡ് 400 ബൈക്കിന്റെ അതേ ചേസിസും പവർട്രെയിനുമാണ് ഈ ബൈക്കിലുമുള്ളത്. റോഡ്സ്റ്റർ മോഡലിനെക്കാൾ ഭാരമുള്ളതായിരിക്കും ട്രയംഫ് സ്ക്രാമ്പ്ളർ 400എക്സ്.
കുറച്ച് ദിവസങ്ങൾക്ക് മുമ്പ് ആഗോള വിപണിയിലെത്തിയ മൂന്നാം തലമുറ കെടിഎം 390 ഡ്യൂക്ക് ഇന്ത്യയിലെ ഡ്യൂക്ക് ബൈക്കുകളുടെ ജനപ്രിതി കണക്കിലെടുത്ത് ഈ വർഷം അവസാനത്തിന് മുമ്പ് ഇന്ത്യയിൽ അവതരിപ്പിക്കുമെന്നാണ് പ്രതീക്ഷിക്കുന്നത്. റീഡിസൈൻ ചെയ്ത മോട്ടോർസൈക്കിളിന് ഹാർഡ്വെയറിൽ കാര്യമായ മാറ്റങ്ങൾ ഉണ്ടായിരിക്കും. പുതിയ 398 സിസി ലിക്വിഡ്-കൂൾഡ് എഞ്ചിനുമായിട്ടാണ് കെടിഎം 390 ഡ്യൂക്കിന്റെ പുതിയ മോഡൽ വരുന്നത്. ഇത് കൂടുതൽ പവറും ടോർക്കും ഉത്പാദിപ്പിക്കും.
വൈകാതെ ഇന്ത്യയിലെത്താൻ പോകുന്ന മറ്റൊരു പ്രധാന മോട്ടോർസൈക്കിളാണ് യമഹ YZF-R3, MT-03 എന്നിവ. ഇതിൽ R3 മത്സരിക്കുക RC390യുമായിട്ടായിരിക്കും. MT-03 എന്ന മോഡൽ വരാനിരിക്കുന്ന 390 ഡ്യൂക്കിനെ നേരിടാനുള്ള മോട്ടോർസൈക്കിളാണ്. 40 പിഎസ് പവറും 29.5 എൻഎം പീക്ക് ടോർക്കും ഉത്പാദിപ്പിക്കുന്ന 321 സിസി ലിക്വിഡ് കൂൾഡ് പാരലൽ ട്വിൻ സിലിണ്ടർ എഞ്ചിനാണ് ഈ ബൈക്കുകളിൽ യമഹ നൽകുന്നത്. അപ്രീലിയ ആർഎസ് 440 മോട്ടോർസൈക്കിൾ സെപ്തംബർ 7ന് അവതരിപ്പിക്കാൻ പോവുകയാണ്. ഡ്യൂവൽ സ്പാർ അലൂമിനിയം ഫ്രെയിമുമായി വരുന്ന ഈ മോട്ടോർസൈക്കിൾ ആർഎസ്660 എന്ന മോഡലിൽ നിന്ന് പ്രചോദനം ഉൾക്കൊണ്ടാണ് വരുന്നത്. 440 സിസി പാരലൽ ട്വിൻ എഞ്ചിനായിരിക്കും ഈ ബൈക്കിന് കരുത്ത് നൽകുന്നത്. ഏകദേശം 4.5 ലക്ഷം രൂപ എക്സ്-ഷോറൂം വിലയുള്ള മോഡലായിരിക്കും ഇത്.
