ആലപ്പുഴ : ചേര്‍ത്തല തിരുവിഴ, അരീപറമ്പ് ഭാഗങ്ങളില്‍ ഭീതി പരത്തി കവര്‍ച്ചാ സംഘം. ശനിയാഴ്ച പുലര്‍ച്ചെ വീട്ടമ്മയുടെ സ്വര്‍ണമാല കവര്‍ന്നു. നിരവധി വീടുകളില്‍ കവര്‍ച്ചശ്രമവും ഉണ്ടായി. കവര്‍ച്ചാ സംഘത്തിന്റെ ദൃശ്യങ്ങള്‍ സിസിടിവി ക്യാമറയില്‍ പതിഞ്ഞു. വിജയപുരം കാര്‍ത്തികേയന്റെ വീട്ടിലും പട്ടേക്കാട്ട് യമുനയുടെ വീട്ടിലും കവര്‍ച്ച സംഘമെത്തി അടുക്കള വാതില്‍ തകര്‍ത്തു. എന്നാല്‍ വീട്ടുകാര്‍ ഉണര്‍ന്നതോടെ കവര്‍ച്ച നടത്താനായില്ല.
തുടര്‍ന്ന് തിരുവിഴ ഭാഗത്തെത്തിയ മോഷ്ടാക്കള്‍ ചൂഴനാട് ശാന്തകുമാറിന്റെ ഭാര്യയുടെ മാല പൊട്ടിച്ചെടുത്ത് കടന്നു. ചേര്‍ത്തല അരീപ്പറമ്പ് ഭാഗത്ത് ഗിരികുമാര്‍, ശിവദാസന്‍, മംഗളാനന്ദന്‍ എന്നിവരുടെ വീടുകളിലാണ് മോഷ്ടാക്കള്‍ ആദ്യമെത്തിയത്. കുറവംതറ പവിത്രന്റെ ഭാര്യ ലീലയുടെ കഴുത്തില്‍ നിന്നും മാല പൊട്ടിച്ചെടുക്കാന്‍ ശ്രമിച്ചെങ്കിലും, വിഫലമായി. ബലപ്രയോഗത്തിനിടെ ലീലയ്ക്ക് നേരിയ പരുക്കേറ്റു. മോഷ്ടാക്കളുടെ ദൃശ്യങ്ങള്‍ സിസിടിവി ക്യാമറയില്‍ പതിഞ്ഞിട്ടുണ്ട്. പോലീസ് അന്വേഷണം ഊര്‍ജിതമാക്കി.
