തിരുവല്ല : തിരുമൂലപുരം ആസാദ് നഗർ റസിഡന്റ് അസോസിയേഷന്റെ പത്താം വാർഷിക സമ്മേളനത്തോടനുബന്ധിച്ച് ദശവാർഷിക സ്മരണിക ‘മുന്നോട്ട്’ പ്രകാശനം ചെയ്തു. സമ്മേളനം ഉദ്ഘാടനം ചെയ്ത മാത്യു ടി.തോമസ് എം.എൽ.എയിൽ നിന്നും ചീഫ് എഡിറ്റർ ടി.എൻ. സുരേന്ദ്രൻ സ്മരണിക ഏറ്റുവാങ്ങി പ്രകാശനം നിർവഹിച്ചു. അസോസിയേഷൻ പ്രസിഡന്റ് എം.കെ. ശശിധരൻ അദ്ധ്യക്ഷത വഹിച്ചു. എം.ജി.സോമൻ മെമ്മോറിയൽ ട്രോഫികൾ ഡിവൈ.എസ്.പി എസ്. അഷാദ് വിതരണം ചെയ്തു. നഗരസഭ വൈസ് ചെയർമാൻ ജോസ് പഴയിടം മുൻഭരണസമിതി അംഗങ്ങളെയും വാർഡ് കൗൺസിലർ ലെജു എം.സക്കറിയ കുടുംബശ്രീ യൂണിറ്റുകളെയും ആദരിച്ചു.
മുൻകൗൺസിലർ ബിനോജ് വർഗീസ് കലാപരിപാടികൾ ഉദ്ഘാടനം ചെയ്തു. അസോസിയേഷൻ സെക്രട്ടറി പി.ടി.വിശ്വനാഥൻ റിപ്പോർട്ടും ട്രഷറർ ചെറിയാൻ മാത്യു കണക്കും അവതരിപ്പിച്ചു. പ്രോഗ്രാംകമ്മിറ്റി കൺവീനർ ഡോ.ആർ. വിജയമോഹനൻ, മുൻ പ്രസിഡന്റ് ടി.എൻ.ഗോപാലകൃഷ്ണൻ, പ്രത്യേക ക്ഷണിതാവ് കുരുവിള മാമ്മൻ, രേഖാമോഹൻ, ബിനീഷ് ബി, മുൻസെക്രട്ടറി സന്തോഷ് അഞ്ചേരിൽ എന്നിവർ സംസാരിച്ചു. മുൻ നഗരസഭാ ചെയർമാൻ ആർ.ജയകുമാർ, മുൻകൗൺസിലർ എം.പി.ഗോപാലകൃഷ്ണൻ, എം.ജി.എം ഹൈസ്കൂൾ റിട്ട.ഹെഡ്മാസ്റ്റർ എ.ഐ.വർഗീസ് എന്നിവരെ ആദരിച്ചു. ഇരുവെള്ളിപ്ര ഗൗരീപുത്ര സംഘത്തിന്റെ തിരുവാതിരയും സ്കൂൾ കുട്ടികളുടെ കലാപരിപാടികളും ഉണ്ടായിരുന്നു.
