കേരളാ കോണ്ഗ്രസിന്റെ അന്ത്യകൂദാശ ഈ തെരഞ്ഞെടുപ്പില് ഉണ്ടാകുമെന്നാണ് രാഷ്ട്രീയ നിരീക്ഷകര് വിലയിരുത്തുന്നത്.
പാലാ : പാലാ നിയമസഭാ മണ്ഡലത്തിലെ തെരഞ്ഞെടുപ്പ് ഇത്തവണ കേരളം മുഴുവന് ശ്രദ്ധിക്കപ്പെടും. യു.ഡി.എഫിന്റെ രൂപീകരണത്തില് നിര്ണ്ണായക പങ്കുവഹിച്ച കെ.എം.മാണിയുടെ പാര്ട്ടിയായ കേരളാ കോണ്ഗ്രസിന്റെ ഭാവി നിര്ണ്ണയിക്കുന്ന തെരഞ്ഞെടുപ്പായിരിക്കും ഇപ്രാവശ്യം നടക്കുക. യു.ഡി.എഫിനു വേണ്ടി എന്.സി.പിയുടെ മാണി സി.കാപ്പന് പോരിന് ഇറങ്ങുമ്പോള് കെ.എം.മാണിയുടെ മകന് പാലായില് നിന്ന് ഒളിച്ചോടുവാന് കഴിയില്ല. നിലവിലുള്ള സാഹചര്യം യു.ഡി.എഫിനും മാണി.സി.കാപ്പനും വളരെ അനുകൂലമാണ്. തെരഞ്ഞെടുപ്പില് കാപ്പനോട് പരാജയപ്പെട്ടാല് ജോസ്.കെ.മാണിയുടെ കേരളാ കോണ്ഗ്രസിന്റെ വിലാസം നഷ്ടപ്പെടും. എല്.ഡി.എഫിന് അധികാരംകൂടി നഷ്ടപ്പെടുന്നതോടെ ജോസ് കെ.മാണി കറിവേപ്പിലപോലെയാകും. അതുകൊണ്ടുതന്നെ ജോസ് കെ.മാണിയുടെ കേരളാ കോണ്ഗ്രസിന്റെ അന്ത്യകൂദാശ ഈ തെരഞ്ഞെടുപ്പില് ഉണ്ടാകുമെന്നാണ് രാഷ്ട്രീയ നിരീക്ഷകര് വിലയിരുത്തുന്നത്.
അണികളും പ്രവര്ത്തകരും കടുത്ത ആശങ്കയിലാണ്. മുതിര്ന്ന നേതാക്കളുടെ തീരുമാനം പാര്ട്ടിയുടെ ശവക്കുഴി തോണ്ടുകയാണെന്നും യു.ഡി.എഫ് പ്രവേശനം അടച്ചത് ഗുരുതരമായ ഭവിഷ്യത്തുകള്ക്ക് വഴിയൊരുക്കുമെന്നും താഴെതട്ടിലുള്ള പ്രവര്ത്തകര് വിലയിരുത്തുന്നു. റോഷി അഗസ്റ്റിന്റെ തീരുമാനമാണ് ഇപ്പോള് പാര്ട്ടിയില് നടക്കുന്നത്. പിണറായി വിജയന്റെ ശൈലിയാണ് റോഷി നടപ്പിലാക്കുന്നതെന്നും ജോസ് കെ.മാണിയുടെ കയ്യില് നിന്നും പാര്ട്ടിയുടെ കടിഞ്ഞാന് നഷ്ടമായെന്നും പ്രവര്ത്തകര് പറയുന്നു. എല്.ഡി.എഫിന്റെ ഭാഗമായി നിന്നുകൊണ്ട് തെരഞ്ഞെടുപ്പിനെ നേരിടുവാന് ഒരുക്കമല്ലെന്ന് പ്രവര്ത്തകര് ജോസ്.കെ.മാണിയെ അറിയിച്ചിട്ടുണ്ടെന്നാണ് ലഭിക്കുന്ന വിവരം. അതുകൊണ്ടുതന്നെ വരുംദിവസങ്ങളില് കേരളാ കോണ്ഗ്രസ് മാണി ഗ്രൂപ്പില് നിന്നും വലിയൊരു ഒഴുക്ക് കോണ്ഗ്രസിലേക്ക് ഉണ്ടാകുവാന് സാധ്യതയുണ്ട്.
