തിരുവനന്തപുരം : തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനായി ഈ മാസം 16 വരെ വോട്ടര് പട്ടികയില് പേരു ചേര്ക്കാം. www.lsgele ction.kerala.gov.in എന്ന വെബ്സൈറ്റിലൂടെ പുതുതായി പേരു ചേര്ക്കാം. കൂടാതെ താമസം മാറിയിട്ടുണ്ടെങ്കില് ഒരു വാര്ഡില് നിന്നു മറ്റൊരു വാര്ഡിലേക്കു പേരു മാറ്റാനും വിലാസത്തിലോ പേരിലോ മാറ്റം വരുത്താനുമുള്ള അവസരം വോട്ടര്ക്കു ലഭിക്കും.
ഓണ്ലൈന് അപേക്ഷ സമര്പ്പിച്ച് ഫോട്ടോ അപ്ലോഡ് ചെയ്യുകയോ ഫോട്ടോ ലഭ്യമാക്കുകയോ ചെയ്തിട്ടുള്ളവരുടെ കാര്യത്തില് തടസവാദമൊന്നും ഇല്ലെങ്കില് പേര് ഉള്പ്പെടുത്തുമെന്നും എന്തെങ്കിലും കാരണത്താല് ഇപ്പോള് പേരു ചേര്ക്കാന് കഴിയാത്തവര്ക്ക് തദ്ദേശ തെരഞ്ഞെടുപ്പിനു മുമ്പ് വീണ്ടും അവസരം നല്കുമെന്നും കമ്മീഷണര് വി. ഭാസ്കരന് അറിയിച്ചു.
അപേക്ഷകളുടെ ഹിയറിംഗ് 23-നു മുന്പ് പൂര്ത്തിയാക്കും. ഈ മാസം 25-ന് അന്തിമ വോട്ടര്പട്ടിക പ്രസിദ്ധീകരിക്കും. കൊവിഡ്-19 വ്യാപനം തടയുന്നതിനുള്ള ജാഗ്രതാ നിര്ദേശത്തിന്റെ പശ്ചാത്തലത്തില് തദ്ദേശ സ്ഥാപനങ്ങളിലെ തെരഞ്ഞെടുപ്പിനുള്ള വോട്ടര്പട്ടികയില് പേരു ചേര്ക്കാന് അപേക്ഷിച്ച അര്ഹതയുള്ളവരെ നേരിട്ടു ഹാജരാകുന്നതില് നിന്ന് ഒഴിവാക്കി പട്ടികയില് ഉള്പ്പെടുത്തണമെന്ന് സംസ്ഥാന തെരഞ്ഞടുപ്പു കമ്മീഷണര് വി. ഭാസ്കരന് ഇലക്ടറല് രജിസ്ട്രേഷന് ഓഫീസര്മാര്ക്ക് നിര്ദേശം നല്കി.