കോഴഞ്ചേരി : കോഴഞ്ചേരി സെന്റ് തോമസ് കോളജിലെ 1999-2002 ബാച്ച് ബിഎ എക്കണോമിക്സ് വിദ്യാർത്ഥിയായിരുന്ന പരേതനായ ബിബി പി വർഗീസിന്റെ സ്മരണാർത്ഥം സഹപാഠികൾ ഏര്പ്പെടുത്തിയ അവാര്ഡ് ഇത്തവണ അനുജ എസ് കുറുപ്പിന്. പത്തനംതിട്ട ജില്ലാ പഞ്ചായത്ത് വൈസ് പ്രസിഡന്റ് സാറാ തോമസ് അവാര്ഡ് സമ്മാനിച്ചു. സഹപാഠിയുടെ സ്മരണ നിലനിർത്തുന്നതിനായി സുഹൃത്തുക്കൾ നടത്തുന്ന ഈ യത്നത്തെ ജില്ലാ പഞ്ചായത്ത് വൈസ് പ്രസിഡന്റ് അഭിനന്ദിച്ചു. വിദ്യാർത്ഥി സമൂഹത്തിന് മാതൃകയായി മാറുന്ന പ്രവർത്തനങ്ങളാണ് ഇതെന്ന് അവര് പറഞ്ഞു.
കോഴഞ്ചേരി സെന്റ് തോമസ് കോളജിലെ ബിഎ ഇക്കണോമിക്സിന് ഏറ്റവും കൂടുതൽ മാർക്ക് വാങ്ങുന്ന വിദ്യാർത്ഥിക്ക് ക്യാഷ് അവാർഡും മെമെന്റോയും ആണ് നല്കുന്നത്. ഇത്തവണ ഏറ്റവും ഉയർന്ന മാർക്ക് നേടിയത് അനുജ എസ് കുറുപ്പ് ആയിരുന്നു. റെജി ചാക്കോയുടെ അദ്ധ്യക്ഷതയിൽ കൂടിയ രണ്ടാമത് ബിബി പി വർഗീസ് അനുസ്മരണ സമ്മേളനത്തിൽ സെന്റ് തോമസ് കോളേജ് പ്രിൻസിപ്പൽ ഡോ. റോയി ജോർജ് കെ മുഖ്യപ്രഭാഷണം നടത്തി. ജെബി തോമസ് സ്വാഗതം ആശംസിച്ചു. ഡോ. സുരേഷ് മാത്യു കോശി, ഡോ. ലിബൂസ് ജേക്കബ് എബ്രഹാം എന്നിവർ ആശംസകൾ നേർന്നു. അനിത സജികുമാർ കൃതജ്ഞത അർപ്പിച്ചു. ബിബിയുടെ ബന്ധുക്കളും സഹപാഠികളും കോളേജിലെ വിദ്യാർത്ഥികളും ചടങ്ങിൽ പങ്കെടുത്തു.
