ആലുവ : ദേശീയപാതയിൽ ആലുവ കമ്പനിപ്പടി മെട്രോ സ്റ്റേഷന് സമീപം കെഎസ്ആർടിസി ബസും വാനും കൂട്ടിയിടിച്ച് അപകടം. ശനിയാഴ്ച രാവിലെ എട്ടരയോടെയായിരുന്നു സംഭവം. കമ്പനിപ്പടിയിലെ യൂ-ടേൺ എടുക്കുന്നതിനിടയിൽ എറണാകുളം ഭാഗത്തേക്ക് പോകുകയായിരുന്ന ബസ് വാനിന്റെ പിന്നിൽ ഇടിക്കുകയായിരുന്നു. തുടർന്ന് വാൻ മുന്നിലുള്ള മറ്റൊരു വാഹനത്തിലും ഇടിച്ചതായി പറയുന്നു. പരിക്കേറ്റ വാൻ ഡ്രൈവറെ സ്വകാര്യ ആശുപത്രിയിൽ പ്രവേശിപ്പിച്ചു. ആലുവ ഈസ്റ്റ് പോലീസ് മേൽനടപടികൾ സ്വീകരിച്ചു വരുന്നു.
