തൊടുപുഴ : നഗരസഭ പാര്ക്കിന്റെ നവീകരണം പൂര്ത്തിയാക്കി ഡിസംബറോടെ തുറക്കും. തുരുമ്പെടുത്ത് നശിച്ചു തുടങ്ങിയ കളി ഉപകരണങ്ങളടക്കം മാറ്റി. 80 ലക്ഷം രൂപ ചെലവിട്ടു. തൊടുപുഴയില് കുട്ടികള്ക്ക് വിനോദത്തിനും ഉല്ലസിക്കാനുമുള്ള ഏക സ്ഥലം കൂടിയാണ് പാര്ക്ക്. ദിവസേന നൂറുകണക്കിന് കുട്ടികളും മാതാപിതാക്കളുമാണ് സായാഹ്നങ്ങള് ചെലവിടാനെത്തിയിരുന്നത്. കോവിഡിന്റെ പശ്ചാത്തലത്തില് പാര്ക്ക് അടഞ്ഞത് ഉപയോഗപ്പെടുത്തി നിര്മാണം ആരംഭിച്ചു.
പൊട്ടിത്തകര്ന്നതും അപകടകരമായ കളിയുപകരണങ്ങളിലുമാണ് നേരത്തേ കുട്ടികള് വിനോദത്തിലേര്പ്പെട്ടിരുന്നത്. സ്ലൈഡര് ഉള്പ്പെടെ പല വിനോദോപാധികളും തുരുമ്പെടുത്തു നശിച്ചിരുന്നു. ഇതെല്ലാം മാറ്റി പുതിയ കളി ഉപകരണങ്ങള് സ്ഥാപിക്കുന്ന ജോലികളാണ് പുരോഗമിക്കുന്നത്. മഴ മൂലം നിര്മാണ പ്രവര്ത്തനങ്ങള് വൈകിയെങ്കിലും നവീകരണം വേഗത്തില് പൂര്ത്തിയാക്കി ഡിസംബറോടെ തുറന്നു നല്കാന് കഴിയുമെന്ന് ചെയര്മാന് സനീഷ് ജോര്ജ് ‘മാധ്യമ’ത്തോട് പറഞ്ഞു.
പാര്ക്കിന്റെ മുഖം മാറും
പാര്ക്കില് തകരാറിലായ കളി ഉപകരണങ്ങളും ഇരിപ്പിടങ്ങളും മാറ്റി സ്ഥാപിച്ചു കഴിഞ്ഞു. കൂടാതെ പുതുതായി സൈക്കിള് ട്രാക്ക്, സിന്തറ്റിക് ട്രാക്, ഓപണ് ജിം, ചെറിയ നീന്തല്ക്കുളം, സന്ദര്ശകര്ക്ക് പ്രകൃതിദത്തമായ ശുദ്ധജലം ലഭിക്കാന് കിണര് എന്നിവ നിര്മിക്കും. തൊടുപുഴയിലെ പ്രാദേശിക കലാകാരന്മാര്ക്ക് കലകള് അവതരിപ്പിക്കാന് സാംസ്കാരിക കേന്ദ്രവും സ്ഥാപിക്കുന്നുണ്ട്. മത്സ്യക്കുളത്തിലെ വെള്ളം വറ്റിച്ച് ഇവിടെ ചെറിയ കുട്ടികള്ക്ക് കളിക്കാനുള്ള സൗകര്യവും മാതാപിതാക്കള്ക്ക് ഇത് വീക്ഷിക്കാനായി ചുറ്റും ഇരിപ്പിടങ്ങളും ഒരുക്കുന്നുണ്ട്. വൈദ്യുതി വിളക്കുകളും മാറ്റിസ്ഥാപിക്കും.
കഴിഞ്ഞ ഭരണസമിതിയുടെ കാലത്ത് പാര്ക്ക് നവീകരണത്തിനായി 65 ലക്ഷം രൂപയുടെ പദ്ധതിക്ക് രൂപം നല്കിയിരുന്നു. കുട്ടികള്ക്കായി ടോയ്സ് കാറുകളുള്ള ട്രാഫിക് പാര്ക്കും ട്രാഫിക് നിയമങ്ങളെക്കുറിച്ച് ബോധവാന്മാരാക്കുന്നതിന് മുന്നറിയിപ്പ് ബോര്ഡുകളും വാട്ടര് സ്ലൈഡിങ് സംവിധാനവും ഉള്പ്പെടെ പദ്ധതിയാണ് അന്ന് വിഭാവനം ചെയ്തത്. ഇലക്ട്രിക്കല് ജോലികളും പെയിന്റിങ്ങുമാണ് ഇനി പ്രധാനമായും പൂര്ത്തിയാകാനുള്ളത്. ഇവ ഡിസംബറോടെ പൂര്ത്തിയാക്കാന് കഴിയുമെന്നും ചെയര്മാന് അറിയിച്ചു.