തിരുവനന്തപുരം : എന്ഫോഴ്സ്മെന്റ് ഡയറക്ടറേറ്റിന് എതിരെ രൂക്ഷ വിമര്ശനവുമായി മുന്മന്ത്രി തോമസ് ഐസക്കിന്റെ ഫെയ്സ്ബുക്ക് പോസ്റ്റ്. ഇ.ഡിയെ ഒരു പുല്ലുപേടിയും ഇല്ലെന്നും ഇവിടെ കുതിരകയറാന് നോക്കേണ്ടെന്നും അദ്ദേഹം ഫെയ്സ്ബുക്കില് കുറിച്ചു. എന്തിനാണ് ഇ.ഡി തനിക്ക് സമന്സ് അയച്ചതെന്നാണ് അദ്ദേഹം പോസ്റ്റിലൂടെ ചോദിക്കുന്നത്. സ്വകാര്യ വിവരങ്ങളടക്കം നീണ്ട രേഖകളുടെ ലിസ്റ്റ് ഹാജരാക്കണമെന്ന് ആവശ്യപ്പെട്ടതിന്റെ അര്ത്ഥം എന്താണ്. പ്രാഥമിക ഘട്ടത്തില് തന്നെ ഇത്രയും വിവരങ്ങള് തേടുന്നത് എന്തിനാണെന്ന് കോടതി തന്നെ ചോദിച്ചിട്ടുണ്ട്.
ഹര്ജിക്കാരന്റെ സ്വകാര്യതയെ മാനിക്കാതെയുള്ള നിലപാടുകളാണ് ഇ.ഡി കൈക്കൊള്ളുന്നത്. ചുരുക്കത്തില് ഇ.ഡി ആശയക്കുഴപ്പത്തിലാണെന്ന് വ്യക്തമാണ്. പതിനായിരക്കണക്കിന് കോടി രൂപയുടെ ഇടപാടുകളല്ലേ, എന്തെങ്കിലും കാലില് തടയുമെന്നാണ് ഇ.ഡിയുടെ ചിന്ത. അതിനായിരിക്കണം എന്നെ വിളിപ്പിച്ചത്. ഇനിയിപ്പോള് രണ്ടിലൊന്ന് ഇ.ഡി കോടതിയില് പറഞ്ഞേ തീരൂവെന്നും അദ്ദേഹം വ്യക്തമാക്കുന്നു.
