അമ്പലപ്പുഴ : പുറക്കാട് ഗ്രാമപ്പഞ്ചായത്തിലെ തോണിക്കടവ് പാലം അപകടഭീഷണിയിൽ. പാലത്തിന്റെ അനുബന്ധപാതയും കൽക്കെട്ടുമിടിഞ്ഞതാണ് അപകടഭീഷണിയാകുന്നത്. കാൽനടയാത്രക്കാരും ഇരുചക്രവാഹനയാത്രികരും അപകടത്തിൽപ്പെടുന്നത് പതിവാണ്. 2002-ൽ വി.എം. സുധീരൻ എംപിയായിരുന്നപ്പോൾ പ്രാദേശികവികസന പദ്ധതിയിൽപ്പെടുത്തി നിർമിച്ചതാണ് നാലുചിറ തോണിക്കടവ് പാലം. സുധീരൻ പാലമെന്നാണ് ഇത് പ്രാദേശികമായി അറിയപ്പെടുന്നത്.
നാലുചിറ, ഇല്ലിച്ചിറ, മുക്കട, കൊച്ചുപുത്തൻകരി പ്രദേശവാസികളുടെ ഏക യാത്രാമാർഗമാണ്. പാലം കടന്നാൽ മുക്കടവഴി കുന്നുമ്മ, തകഴി പ്രദേശങ്ങളിലേക്കും ഇല്ലിച്ചിറവഴി ദേശീയപാതയിലേക്കും എത്താനാകും. നിർദിഷ്ട കരുമാടി-കൊട്ടാരവളവ് ബൈപ്പാസ് യാഥാർഥ്യമാകുമ്പോൾ തോണിക്കടവ് പാലത്തിന്റെ പ്രാധാന്യം വർധിക്കും. കോരംകുഴി തോട്ടിലെ ശക്തമായ ഒഴുക്കും വെള്ളപ്പൊക്കവുമാണ് പാലത്തിന്റെ കൽക്കെട്ടും അനുബന്ധപാതയും തകരാൻ കാരണമായത്.
