പത്തനംതിട്ട : അയിരൂര് ചെറുകോല്പ്പുഴയില് കോണ്ഗ്രസ് വാര്ഡ് പ്രസിഡന്റ് എം.എം. വര്ഗീസിനെ ആള്ക്കൂട്ട വിചാരണ നടത്തി ക്രൂരമായ മര്ദ്ദിച്ച ഗ്രാമപഞ്ചായത്ത് മെമ്പര് ഉള്പ്പെടെയുള്ള സി.പി.എം നേതാക്കള്ക്കെതിരെ കേസ് രജിസ്റ്റര് ചെയ്ത് അന്വേഷണം നടത്തി നിയമനടപടികള് സ്വീകരിക്കണമെന്ന് ഡി.സി.സി പ്രസിഡന്റ് പ്രൊഫ സതീഷ് കൊച്ചുപറമ്പില് ആവശ്യപ്പെട്ടു.
വാര്ഡ് പ്രസിഡന്റിനെതിരായി എതിരായി എന്തെങ്കിലും ആരോപണം ഉണ്ടെങ്കില് നിയമപരമായി അന്വേഷിക്കുന്നതിന് പകരം സി.പി.എം നേതാക്കള് നിയമം കയ്യിലെടുത്ത് രാഷ്ട്രീയ പകപോക്കലിന് വേണ്ടി വാര്ഡ് പ്രസിഡന്റിനെ കഴുത്തില് കയര് മുറുക്കി ക്രൂരമായി മര്ദ്ദിക്കുന്നതിന് നേതൃത്വം നല്കിയ ഗ്രാമപഞ്ചായത്ത് അംഗം ഉള്പ്പെടെയുള്ള സി.പി.എം ഡി.വൈ.എഫ്.ഐ പ്രാദേശിക നേതാക്കള്ക്കെതിരെ വധശ്രമം ഉള്പ്പെടെയുള്ള വകുപ്പുകള് ചുമത്തി അറസ്റ്റ് ചെയ്യണമെന്ന് ഡി.സി.സി പ്രസിഡന്റ് ആവശ്യപ്പെട്ടു.
എം.എം. വര്ഗീസിനോട് വിദേശത്ത് പോകുവാന് സഹായം ചോദിച്ചുവന്ന ആളിനെ സഹായിക്കുകമാത്രമാണ് ചെയ്തതെന്നും അതിന്റെ പേരില് നിയമം കയ്യിലെടുത്ത് കഴുത്തില് കയര്കെട്ടിവലിച്ച് ക്രൂരമായി മര്ദ്ദി്ക്കുകയും അത് വീഡിയോ പകര്ത്തി പ്രചരിപ്പിക്കുകയും ചെയ്ത നടപടി ഹീനവും പ്രതിഷേധാര്ഹവുമാണ്. ഇത് അംഗീകരിക്കാനാവില്ലെന്നും കുറ്റക്കാര്ക്കെതിരെ നടപടി സ്വീകരിച്ചില്ലെങ്കില് ശക്തമായ സമരപരിപാടികള്ക്ക് നേതൃത്വം നല്കുമെന്നും ഡി.സി.സി പ്രസിഡന്റ് പറഞ്ഞു. ക്രൂരമായ മര്ദ്ദനത്തെതുടര്ന്ന് കോഴഞ്ചേരി സ്വകാര്യ ആശുപത്രിയില് ചികിത്സയില് കഴിയുന്ന എം.എം. വര്ഗീസിനെ ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പിലും മറ്റ് നേതാക്കളും സന്ദര്ശിച്ചു.
