പന്തളം: റോഡ് സുരക്ഷാ നിയമങ്ങളെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനായി തോട്ടക്കോണം ഗവൺമെന്റ് ഹയർ സെക്കൻഡറി സ്കൂളിലെ സ്റ്റുഡന്റ് പോലീസ് കേഡറ്റുകൾ പന്തളം എസ് ഐ ശരത് കൃഷ്ണന്റെ നേതൃത്വത്തിൽ ട്രാഫിക് അവയർനസ് ക്യാമ്പയിൻ സംഘടിപ്പിച്ചു. നടപ്പാതകൾ നമ്മുടെ അവകാശം എന്ന സന്ദേശത്തിന് മുൻഗണന നൽകിക്കൊണ്ടായിരുന്നു ക്യാമ്പയിൻ സംഘടിപ്പിച്ചത്.
റോഡിലൂടെ യാത്ര ചെയ്യുന്നവർ പാലിക്കേണ്ട കൃത്യമായ നിയമങ്ങളെക്കുറിച്ചും കാൽനട യാത്രക്കാരുടെ അവകാശങ്ങളെക്കുറിച്ചും കേഡറ്റുകൾ യാത്രക്കാർക്ക് വിശദീകരിച്ചു നൽകി.
സീബ്രാ ക്രോസിംഗുകളുടെ പ്രാധാന്യം, അമിതവേഗതയുടെ ആപത്തുകൾ, ട്രാഫിക് സിഗ്നലുകൾ പാലിക്കേണ്ടതിന്റെ വശങ്ങൾ എന്നിവയെക്കുറിച്ച് കേഡറ്റുകൾ ലഘുലേഖകൾ വിതരണം ചെയ്യുകയും യാത്രക്കാരോട് സംസാരിക്കുകയും ചെയ്തു. റോഡുകൾ കാൽനട യാത്രക്കാർക്ക് കൂടി സുരക്ഷിതമായി ഉപയോഗിക്കാനുള്ളതാണെന്ന ബോധ്യം ഡ്രൈവർമാരിലും പൊതുജനങ്ങളിലും എത്തിക്കുക എന്നതായിരുന്നു പരിപാടിയുടെ പ്രധാന ലക്ഷ്യം. സി.പി.ഒമാരും ഡി ഐയും പരിപാടിയിൽ പങ്കെടുത്തു.
