റാന്നി : പെരുനാട് ഗ്രാമപഞ്ചായത്ത് പതിനാലാം വാർഡ് കക്കാടില് തൊഴിൽ നിർത്തിവെപ്പിച്ച് യൂണിയൻ പ്രവർത്തനം. സമീപവാർഡിലെ മുൻ പഞ്ചായത്ത് മെമ്പറും ഇപ്പോൾ തൊഴിലുറപ്പ് മേറ്റുമായ രാധാ പ്രസന്നനാണ് സ്വന്തം സൈറ്റിലെ പണിസമയത്ത് മറ്റൊരു സൈറ്റിലെത്തി പണി നിർത്തി വെക്കാനും യൂണിയൻ പ്രവർത്തനം നടത്താനും ആവശ്യപ്പെട്ടത്.
തൊഴിൽ സമയത്തെ പാർട്ടി പ്രവർത്തനം കുറ്റകരമായതിനാൽ തൊഴിലുറപ്പ് തൊഴിലാളികൾ ഇത് ചോദ്യം ചെയ്യുകയും അവരെ പറഞ്ഞയക്കുകയും ചെയ്തു. തൊഴിലാളികൾ അറിയിച്ചതനുസരിച്ച് സ്ഥലത്തെത്തിയ വാർഡ് മെമ്പർ അരുൺ അനിരുദ്ധൻ ഇതിനെതിരെ ജില്ലാ, ബ്ലോക്ക് പ്രോഗ്രാം ഓഫീസർക്ക് പരാതി നല്കി. ഇത്തരം കാര്യങ്ങൾ ഇനിയും ആവർത്തിക്കാതിരിക്കാൻ വേണ്ട നടപടി സ്വീകരിക്കണമെന്നും പരാതിയിലൂടെ ആവശ്യപ്പെട്ടു.
