തിരുവമ്പാടി : കനത്ത മഴയെ തുടർന്ന് റോഡരികിൽ രൂപപ്പെട്ട ഗർത്തം ഗതാഗത ഭീഷണി ഉയർത്തുന്നു. പുന്നക്കൽ-വഴിക്കടവ്-പൊന്നാങ്കയം റോഡിൽ വഴിക്കടവ് അങ്കണവാടിക്കു സമീപമാണ് വൻ കുഴി രൂപപ്പെട്ടത്. കലുങ്കിനോട് ചേർന്ന് നേരത്തേ തകർന്നഭാഗം കഴിഞ്ഞ ദിവസം പെയ്ത കനത്ത മഴയിൽ ഗർത്തമായി മാറുകയായിരുന്നു. ചരക്ക് വാഹനങ്ങളടക്കം ഗതാഗത തിരക്കേറിയ റോഡാണിത്. ഉടൻ പ്രവൃത്തി നടത്താത്തപക്ഷം റോഡിന്റെ ഭിത്തിയും ഇടിയാൻ സാധ്യതയുണ്ട്. അടിയന്തര നടപടി വേണമെന്ന് നാട്ടുകാർ ആവശ്യപ്പെട്ടു.
