നെടുമ്പാശ്ശേരി : കൊവിഡ് മഹാമാരിയെ തുടര്ന്ന് ഗള്ഫില് കുടുങ്ങിയ പ്രവാസികളെ നാട്ടിലെത്തിക്കാന് ഇന്ന് കേരളത്തില് നിന്ന് മൂന്നു എയര് ഇന്ത്യ എക്സ് പ്രസ്സ് വിമാനങ്ങള് പറക്കും. കുവൈത്ത്, മസ്കറ്റ്, ദോഹ എന്നിവിടങ്ങളിലേക്കാണ് വിമാനങ്ങള്.
കൊച്ചിയില് നിന്ന് രാവിലെ പത്തിന് പുറപ്പെടുന്ന കുവൈത്തിലേക്കുള്ള വിമാനം രാത്രി 9.15 ന് കൊച്ചിയില് മടങ്ങിയെത്തും. കൊച്ചിയില് നിന്ന് ഉച്ചയ്ക്ക് ഒന്നിന് യാത്ര തിരിക്കുന്ന മസ്കറ്റ് വിമാനം രാത്രി 8.50 ന് തിരിച്ചെത്തും. വൈകിട്ട് നാലിന് പുറപ്പെടുന്ന ദോഹ വിമാനം ഞായറാഴ്ച പുലര്ച്ചെ 1.40 ന് തിരിച്ചെത്തും.
ഞായറാഴ്ച ദോഹയിലെയും ക്വാലാലംപൂരിലെയും പ്രവാസികളെ നാട്ടിലെത്തിക്കാന് രണ്ടുവിമാനങ്ങളാണ് പുറപ്പെടുന്നത്. ഓരോ വിമാനത്താവളത്തിലും ഇറങ്ങാനുള്ള സ്ലോട്ട് ലഭ്യമാകുന്നതിന് അനുസരിച്ച് സമയക്രമത്തില് മാറ്റം വന്നേക്കാം. പ്രവാസികളെ നാട്ടിലേക്കു കൊണ്ടുവരാന് പോകുന്ന വിമാനങ്ങളില് അതത് രാജ്യങ്ങളിലെ പൗരന്മാരെ കൊണ്ടുപോകാനും അനുമതിയുണ്ട്. ബഹ്റൈന്, സിങ്കപ്പൂര്, ഖത്തര് എന്നിവിടങ്ങളിലേയ്ക്കാണ് അവിടത്തെ പൗരന്മാരെയും പെര്മനന്റ് വിസയുള്ള ഇന്ത്യക്കാരെയും കൊണ്ടുപോകാന് അനുമതിയുള്ളത്.
മാലിദ്വീപിലെ പ്രവാസികളായ മലയാളികളെയും കൊണ്ടുള്ള ആദ്യ കപ്പല് ഐഎന്എസ് ജലാശ്വ വെള്ളിയാഴ്ച രാത്രി മാലിദ്വീപില്നിന്ന് കൊച്ചിയിലേക്ക് തിരിച്ചു. ലോക്ക്ഡൗണില് കുടുങ്ങിയ പ്രവാസികളെ നാട്ടിലെത്തിക്കാന് നാവികസേന അയച്ച രണ്ടു കപ്പലുകളില് ആദ്യത്തേതാണിത്.