കോട്ടയം : കോട്ടയത്ത് കേരള കോണ്ഗ്രസ് സ്ഥാനാര്ത്ഥിയാകാന് 3 പേര് ഫ്രാന്സിസ് ജോര്ജ്, പിസി തോമസ് എന്നിവരെ കൂടാതെ കെ എം മാണിയുടെ മരുമകന് എംപി ജോസഫും സാധ്യത പട്ടികയിലുണ്ട്. അതേസമയം കോട്ടയത്ത് ശക്തനായ സ്ഥാനാര്ത്ഥി തന്നെ വേണമെന്നാണ് കോണ്ഗ്രസിന്റെ ആവശ്യം.കോട്ടയം സീറ്റ് വേണമെന്ന് യുഡിഎഫില് ആവശ്യപ്പെട്ടതിന് പിന്നലെ തന്നെ സ്ഥാനാര്ത്ഥി ചര്ച്ചകളും കേരള കോണ്ഗ്രസില് തുടങ്ങി.
പാര്ട്ടി ചെയര്മാന് പി ജെ ജോസഫ് ഉള്പ്പെടെയുള്ളവരുടെ പേരുകള് ചര്ച്ചയായെങ്കിലും ഇപ്പോള് മൂന്നുപേരിലേക്കാണ് ചര്ച്ചകള് എത്തിനില്ക്കുന്നത്. സാധ്യത പട്ടികയില് മുന്പന്തിയില് നില്ക്കുന്നത് ഫ്രാന്സിസ് ജോര്ജാണ്. ഇതിനോടകം മണ്ഡലത്തിലും ഫ്രാന്സിസ് ജോര്ജ് സജീവമാണ്. എന്നാല് പിസി തോമസും മത്സരിക്കാന് തയ്യാറായി നില്ക്കുകയാണ്. പാര്ട്ടി പറഞ്ഞാല് മത്സരിക്കുമെന്ന് പി സി തോമസ് പരസ്യമായി വ്യക്തമാക്കുകയും ചെയ്തു.
