തൃശൂര്: തൃശൂര് പൂരത്തിന്റെ ചടങ്ങുകള് സമാപിച്ചു. തിരുവമ്പാടി പാറമേക്കാവ് ഭഗവതിമാര് ഉപചാരം ചൊല്ലി പിരിഞ്ഞതോടെ ഈ വര്ഷത്തെ പൂരച്ചടങ്ങുകള് അവസാനിച്ചു. 2024 ഏപ്രില് 19നാണ് അടുത്ത വര്ഷത്തെ തൃശൂര് പൂരം. തിരുവമ്പാടി ചന്ദ്രശേഖരന്റെ ശിരസ്സിലേറിയാണ് തിരുവമ്പാടി ഭഗവതി എഴുന്നള്ളിയത്. എറണാകുളം ശിവകുമാറിന്റെ ശിരസ്സിലേറി പാറമേക്കാവ് ഭഗവതിയും എഴുന്നള്ളി. തുടര്ന്ന് ഇരു ആനകളും തുമ്പിക്കൈ ഉയര്ത്തി പരസ്പരം ഉപചാരം ചൊല്ലി.
ഉപചാരം ചൊല്ലി പിരിഞ്ഞ ശേഷം പകല് വെടിക്കെട്ടോടെ ഇക്കൊല്ലത്തെ പൂരം അവസാനിക്കും. അതിന് ശേഷം പൂരക്കഞ്ഞിയും കുടിച്ചായിരിക്കും ദേശക്കാരെല്ലാം തേക്കിന്കാട് മൈതാനിയില് നിന്ന് പിരിഞ്ഞുപോകുക. എട്ട് മണിക്കാണ് എഴുന്നള്ളിപ്പ് തുടങ്ങിയത്. പാറമേക്കാവ് വിഭാഗത്തിന്റെ എഴുന്നള്ളിപ്പ് മണികണ്ഠനാല് ഭാഗത്തുനിന്ന് തുടങ്ങി. 15 ആനകളാണ് നിരന്നത്. കിഴക്കൂട്ട് അനിയന്മാരാരുടെ നേതൃത്വത്തിലുള്ള മേളാരവും ഒപ്പം കുടമാറ്റവും നടന്നു. ഇന്നലെ നടന്ന കുടമാറ്റത്തിന്റെ ചെറിയ രൂപമായിരുന്നു ഇന്ന് നടന്നത്. നായ്ക്കനാല് ഭാഗത്തുനിന്ന് തിരുവമ്പാടി വിഭാഗത്തിന്റെ എഴുന്നള്ളിപ്പും തുടങ്ങി. 14 ആനകള് അണി നിരന്നു. ചേരാനെല്ലൂര് ശങ്കരന്കുട്ടി മാരാരുടെ നേതൃത്വത്തില് മേളം നടന്നു.
