തുമ്പമൺ : എം.ജി. ഹയർസെക്കൻഡറി സ്കൂളിന്റെ 75-ാം വാർഷികാഘോഷം ഫെബ്രുവരി ഒന്നിന് 11.30-ന് ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ ഉദ്ഘാടനം ചെയ്യുമെന്ന് ഭാരവാഹികൾ. ഇതോടനുബന്ധിച്ച് സ്കൂൾ വാർഷികദിനാഘോഷവും സേവനത്തിൽനിന്ന് വിരമിക്കുന്ന സ്കൂൾ പ്രിൻസിപ്പൽ അലക്സ് മാത്യുവിന്റെ യാത്രയയപ്പും വിവിധ മത്സരങ്ങളിൽ സംസ്ഥാനതല വിജയികളായ വിദ്യാർഥികൾക്കുള്ള അനുമോദനവും നടത്തും. കാതോലിക്കേറ്റ് ആൻഡ് എം.ഡി.സ്കൂൾസ് കോർപ്പറേറ്റ് മാനേജർ ഡോ. ഗബ്രിയേൽ മാർ ഗ്രീഗോറിയോസ് മെത്രാപ്പോലീത്താ അധ്യക്ഷത വഹിക്കും.
ജൂബിലി ലോഗോയുടെ പ്രകാശനകർമം ആന്റോ ആന്റണി എം.പി.യും ജൂബിലി സ്മാരക ഓഡിറ്റോറിയത്തിന്റെ ധനസമാഹരണം നിയമസഭ ഡെപ്യൂട്ടി സ്പീക്കർ ചിറ്റയം ഗോപകുമാറും ഉദ്ഘാടനം ചെയ്യും. കളക്ടർ എ.ഷിബു മുഖ്യപ്രഭാഷണം നടത്തും. പരുമല തിരുമേനി 1901-ൽ തുമ്പമണിൽ സ്ഥാപിച്ച ഇംഗ്ലീഷ് മീഡിയം മിഡിൽ സ്കൂളിന്റെ തുടർച്ചയായി 1949-ലാണ് മാർ ഗ്രീഗോറിയോസ് ഹയർ സെക്കൻഡറി സ്കൂൾ സ്ഥാപിതമായത്. ഒരുവർഷം നീണ്ടുനിൽക്കുന്ന ജൂബിലി ആഘോഷപരിപാടികളുടെ ഭാഗമായി വജ്രജൂബിലി സ്മാരക ഓഡിറ്റോറിയം നിർമാണം, പൂർവ വിദ്യാർഥിസംഗമം, ഗുരുവന്ദനം, ഗ്രിഗോറിയൻ എക്സലൻസ് അവാർഡ്ദാനം, പഠനസെമിനാറുകൾ, സയൻസ് എക്സ്ബിഷൻ, ഇന്റർ സ്കൂൾ ഫുട്ബോൾ ടൂർണമെൻറ്, സ്മരണിക പ്രകാശനം തുടങ്ങിയവ സംഘടിപ്പിക്കുമെന്ന് ജൂബിലി ആഘോഷ കമ്മിറ്റി ചെയർമാൻ ഷിബു കെ.എബ്രഹാം, ജനറൽ കൺവീനർമാരായ അലക്സ് മാത്യു, റോയ് ജോൺ, പ്രോഗ്രാം കൺവീനർ റോയ് മാത്യു എന്നിവർ പറഞ്ഞു.
