പാലക്കാട്: അട്ടപ്പാടി വനമേഖലയില്‍ പട്രോളിങ്ങിനിറങ്ങിയ തണ്ടര്‍ബോള്‍ട്ട് സംഘം കനത്ത മഴയെ തുടര്‍ന്ന് വനത്തിനുള്ളില്‍ കുടുങ്ങി. മുരുഗള ഊരിന് സമീപത്തെ വനമേഖലയില്‍ പരിശോധന നടത്തുകയായിരുന്ന സംഘമാണ് ഭവാനിപുഴയില്‍ ജലനിരപ്പ് ഉയര്‍ന്നതിനെ തുടര്‍ന്ന് പുഴ മുറിച്ച്‌ കടക്കാനാവാതെ കുടുങ്ങിയത്.
രാവിലെ മുരുഗള ഭാഗത്തേക്ക് പോയപ്പോള്‍ പുഴയില്‍ ജലനിരപ്പ് ഉയര്‍ന്നിരുന്നില്ല. എന്നാല്‍ പിന്നീട് കനത്ത മഴയെ തുടര്‍ന്ന് പുഴയില്‍ നീരൊഴുക്ക് ശക്തമാവുകയും ജലനിരപ്പ് ഉയരുകയും ചെയ്തു. ഇതോടെ പുഴ മുറിച്ചു കടക്കാനാവാതെ തണ്ടര്‍ബോള്‍ട്ട് സംഘം വനത്തില്‍ തങ്ങി. ആശങ്കപ്പെടേണ്ട സാഹചര്യമില്ലെന്നും ജലനിരപ്പ് താഴ്ന്നാല്‍ മടങ്ങി വരാന്‍ കഴിയുമെന്നും പാലക്കാട് എസ്പി പറഞ്ഞു. തണ്ടര്‍ബോള്‍ട്ട് സംഘവുമായി ആശയവിനിമയം നടക്കുന്നുണ്ടെന്നും എല്ലാവരും സുരക്ഷിതരാണെന്നും അദ്ദേഹം വ്യക്തമാക്കി.
