സുല്ത്താന് ബത്തേരി : പട്ടാപ്പകല് നാട്ടിലിറങ്ങിയ കടുവയുടെ ആക്രമണത്തില് മൂരിക്കിടാവിന് പരിക്കേറ്റു. നായ്ക്കെട്ടിക്കടുത്ത എറളോട്ടുകുന്ന് മേലേടത്ത് പത്മനാഭന്റെ ഒന്നരവയസുള്ള മൂരിക്കിടാവിനെയാണ് കാലത്ത് പത്തരയോടെ വീടിന് സമീപത്ത് നിന്ന് കടുവ പിടികൂടിയത്. മൂരികിടാവിന്റെ പുറത്ത് ആഴത്തിലുള്ള മുറിവ് പറ്റിയിട്ടുണ്ട്.
കഴിഞ്ഞ ഒരാഴ്ചയായി ദേശീയപാത 766-ല് നായ്ക്കെട്ടി എറളോട്ടുകുന്ന് പ്രദേശങ്ങളില് കടുവയെ കണ്ടുവരുന്നുണ്ട്. പത്മനാഭന് മൂരികിടാവിനെ വീടിനടുത്തുള്ള വയലിനടുത്ത് തീറ്റുന്നതിനായി മറ്റ് കന്നുകാലികളോടൊപ്പം കെട്ടിയിട്ടപ്പോഴാണ് ആക്രമണമുണ്ടായത്. മൂരിക്കുട്ടിയുടെ കരച്ചില്കേട്ട് ആളുകള് ഓടിയെത്തിയപ്പോഴേക്കും കടുവ അടുത്തുള്ള തോട്ടത്തിലേക്ക് ഓടിമറഞ്ഞു.
ഒരാഴ്ചയായി കടുവയുടെ സാന്നിദ്ധ്യമുണ്ടായിട്ടും വനം വകുപ്പ് കടുവയെ പിടികൂടുന്നതിനോ ജനങ്ങളുടെ ഭീതി അകറ്റുന്നതിനോ ഒന്നും ചെയ്തിട്ടില്ല. രോഷാകുലരായ ജനങ്ങള് വനംവകുപ്പിനെതിരെ പ്രതിഷേധവുമായി രംഗത്തിറങ്ങി. കടുവയെ ഉടന് കൂട് വെച്ച് പിടികൂടണമെന്ന് നാട്ടുകാര് ആവശ്യപ്പെട്ടു. പ്രതിഷേധം കണക്കിലെടുത്ത് കടുവയെ കൂട് വെച്ച് പിടികൂടാന് വനംവകുപ്പ് തീരുമാനിച്ചു. ഇതിന് വേണ്ട നടപടി ആരംഭിച്ചു. കടുവയുടെ സാന്നിദ്ധ്യം കണ്ട പ്രദേശങ്ങളില് ക്യാമറ സ്ഥാപിച്ചു. ആര്ആര്ടിയുടെ നേതൃത്വത്തില് രാത്രികാല നിരീക്ഷണവും ആരംഭിച്ചു.
