മാനന്തവാടി : ഇരുപത് ദിവസമായി ഒരു നാടാകെ കടുവ ഭീതിയില് വിറങ്ങലിച്ച് നിന്നപ്പോള് തിരിഞ്ഞ് നോക്കാത്ത സംസ്ഥാന മന്ത്രിമാര് കടുവയെ പിടികൂടുന്നതിന് മുമ്പ് വയനാട്ടിലെത്തിയാല് വഴിയില് തടയേണ്ടി വരുമെന്ന് ടി.സിദ്ദീഖ് എം.എല്.എ. മാനന്തവാടിയില് യു.ഡി.എഫ്. നടത്തുന്ന റിലേ സത്യാഗ്രഹം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തുടക്കം മുതല് പ്രശ്നത്തെ സര്ക്കാര് ഗൗരവമായി കാണാത്തതാണ് കടുവയുടെ ശല്യം രൂക്ഷമാക്കിയതെന്നും ജനങ്ങള്ക്കൊപ്പം നില്ക്കുമ്പോള് യു.ഡി.എഫിന് ഇടതുപക്ഷത്തെ പോലെ ഒളിച്ചോടാന് കഴിയില്ലന്നും എം.എല്.എ. കൂട്ടി ചേര്ത്തു.
പയ്യംമ്പള്ളി പ്രദേശം യു.ഡി.എഫിന് രാഷ്ട്രീയ പരമായി മേല്ക്കൈ ഉള്ളതുകൊണ്ടാണ് സ്ഥലം എം.എല്- എ.യും മന്ത്രിമാരും കടുവ വിഷയത്തിലും ജനങ്ങളെ വെല്ലുവിളിച്ച് അവഗണിച്ചതെന്ന് റിലേ സത്യാഗ്രഹത്തിന് നേതൃത്വം നല്കുന്ന ഡി.സി.സി. പ്രസിഡന്റ് എന്.ഡി.അപ്പച്ചനും മറ്റ് യു.ഡി.എഫ്. നേതാക്കളും പറഞ്ഞു. വനം വകുപ്പിന്റെ ഭാഗത്ത് നിന്ന് തുടക്കത്തിലുണ്ടായ പാളിച്ചയാണ് കാര്യങ്ങള് വഷളാക്കിയതെന്ന് ഇവര് ആരോപിച്ചു.
