കോന്നി : ചെങ്ങറ ജനവാസ മേഖലയില് വീണ്ടും കടുവ ഇറങ്ങിയതായി പ്രദേശവാസികള്. കഴിഞ്ഞ ദിവസം രാത്രിയിലാണ് ചെങ്ങറ പായിക്കാട്ട് ജോണിന്റെ ഭാര്യ ബീന വീടിന് സമീപത്തെ പറമ്പില് കടുവയെ കണ്ടതായി പറയുന്നത്. വീടിന്റെ വാതില് തുറന്നപ്പോള് പറമ്പില് കടുവ നില്ക്കുന്നത് കണ്ടതായി പറയുന്നു. തുടര്ന്ന് വനപാലകരും നാട്ടുകാരും ചേര്ന്ന് സ്ഥലത്ത് പരിശോധനകള് നടത്തിയെങ്കിലും കടുവയുടെ സാന്നിധ്യം സ്ഥിരീകരിക്കാന് കഴിഞ്ഞിട്ടില്ല എന്ന് കോന്നി ഫോറസ്റ്റ് റെയ്ഞ്ച് ഓഫീസര് ശശീന്ദ്രകുമാര് പറഞ്ഞു. കഴിഞ്ഞ നാല് ദിവസങ്ങള്ക്കിടയില് മലയാലപ്പുഴ, കോന്നി ഗ്രാമപഞ്ചായത്തുകളുടെ അതിര്ത്തിയില് അഞ്ച് സ്ഥലങ്ങളില് കടുവയെ കണ്ടതായാണ് നാട്ടുകാര് പറയുന്നത്.
കടുവയെ തുടര്ച്ചയായി കണ്ടതിനെ തുടര്ന്ന് സ്ഥലത്ത് വനപാലകരുടെ നേതൃത്വത്തില് തിരച്ചില് ശക്തമാക്കിയിട്ടുണ്ട്. ഡ്രോണ് നിരീക്ഷണം അടക്കം സ്ഥലത്ത് കഴിഞ്ഞ ദിവസം നടത്തിയിരുന്നു. കടുവയുടെ സാന്നിധ്യം സ്ഥിരീകരിച്ചാല് കൂട് വെച്ച് ഇതിനെ പിടികൂടുവാനുള്ള നടപടികളും പുരോഗമിക്കുകയാണ്. കഴിഞ്ഞ ദിവസങ്ങളില് കടുവയെ കണ്ട് ഭയന്നോടിയ വീട്ടമ്മയ്ക്ക് പരിക്കേല്ക്കുകയും ചെയ്തതോടെ ഭീതിയിലാണ് പ്രദേശവാസികള്.
